«Գլամուռն» ու «լոլոյությունն» ապահովված են, մնացածը կարեւոր չէ

Մեկնարկեց նոր կառավարության ձեւավորման գործընթացը, հրապարակվեցին կառավարության նոր անդամների նշանակվելու մասին ՀՀ նախագահի հրամանագրերը։ Որքան էլ զարմանալի է՝ նորանշանակների թվում հին ու հայտնի անուններ կան՝ աշխատակազմի ղեկավար-նախարար Դավիթ Հարությունյան, ՀՀ փոխվարչապետ Վաչե Գաբրիելյան։ Մինչդեռ հայտարարվում էր, թե նոր կառավարությունում տեղ են գտնելու նոր դեմքերը՝ նոր սկզբունքնեով, նոր գործելաոճով։ Անշուշտ նոր անուններ էլ կան, այնքան նոր, որ ոմանց նույնիսկ Googl-ը չի ճանաչում, այսինքն՝ որոնք աշխատանքային կենսագրություն չունեն եւ ենթադրվում է, որ հայտնվել են նոր կառավարությունում բացառապես Կարեն Կարապետյանի հետ ունեցած կապի արդյունքում։ Այսպիսով՝ ֆինանսների նախարար է նշանակվել Վարդան Արամյանը, որը մինչ այդ ՀՀ նախագահի աշխատակազմի ղեկավարի առաջին տեղակալն էր։ Արամյանը նորանշանակներից ամենահայտնին է, 2003 թվականին նշանակվեց ԿԲ դրամավարկային քաղաքականության վարչության և արտաքին հարաբերությունների բաժնի պետ։ Այդ ժամանակ ԿԲ նախագահը նախկին վարչապետ Տիգրան Սարգսյանն էր, նա էլ Արամյանին 2008 թվականին նշանակեց ֆինանսների նախարարի առաջին տեղակալ։ Ամենաուշագրավը Գագիկ Բեգլարյանի պաշտոնանկությունն էր, չնայած տեղեկություններին, որ Բեգլարյանի համար Կարեն Կարապետյանի մոտ բարեխոսել է «Տաշիրի» Սամվել Կարապետյանը, Բեգլարյանն ու Կարապետյանը քավորսանիկական հարաբերություններ ունեն, այդուհանդերձ, Բեգլարյանն էլ չմնաց իր պաշտոնում, ըստ ամենայնի նրան հորդորել են մի քիչ սպասել՝ խոստանալով քաղաքապետի պաշտոնը։ Չնայած նախարարի պաշտոնում էլ նա իրեն շատ լավ էր զգում, քանի որ տնօրինում էր ամենաշահութաբեր՝ 1մլրդ դոլարանոց Հյուսիս-հարավի ծրագիրը։ Կապի և տրանսպորտի նորանշանակ նախարարը Վահան Մարտիրոսյանն է։ Նրա մասին հայտնի է ընդամենը, որ նա «Ռոստելեկոմ»-ի նախկին աշխատող է եղել, այսինքն, նորանշանակ վարչապետը նոր կառավարություն է կանչել-բերել նաեւ ռուսաստանյան շրջանակների աշխատակիցներին։ Իգնատի Առաքելյանը գյուղատնտեսության նախարարի պաշտոնն է զբաղեցնելու՝ փոխարինելով Սերգո Կարապետյանին։ Նա Երևանի կոնյակի գործարանի տնօրենն էր 2015 թվականից, այլ մանրամասներ նոր նախարարի մասին հնարավոր չէ գտնել։ Պակաս ուշագրավ չէ նաեւ Էներգետիկայի և բնական պաշարների նախարար Լեւոն Յոլյանի պաշտոնանկությունը, Յոլյանը համարվում է Սերժ Սարգսյանի «մարդը» ու չի բացառվում, որ Կարեն Կարապետյանի համար նրանից ազատվելը սկզբունքային հարց է եղել, որպեսզի այդկերպ վերացնի բոլոր «ականջները» ու ամենակարեւորը՝ առաջին պլան մղի իր փեսային, որը համակարգի փոխնախարարներից է։ Նորանշանակ նախարարը Աշոտ Մանուկյանն է, «Հրազդան Ջեկ» -ի տնօրենն էր։ Այս ընկերության միակ բաժնետերն է հանդիսանում «ԻՆՏԵՌ ՌԱՕ» բաց բաժնետիրական ընկերությունը, և կարելի է ենթադրել, որ Աշոտ Մանուկյանը եկել է ՀՀ կառավարության համակարգ ռուսական կապերի շնորհիվ։ Մի բան հստակ է, որ Կարեն Կարապետյանի կառավարությունը չի լինելու կարկառուն ՀՀԿ-ականների ներկայություն, սակայն զավեշտը Դավիթ Հարությունյանի վերանշանակումն է։ Այնպիսի տպավորություն է, որ Հարությունյանը հավերժ չինովնիկ է, բոլորը գալիս-գնում են, նա մնում է իր տեղում։ Հարությունյանը սկսեց Քոչարյանի ժամանակներից, լեզու գտավ Սերժ Սարգսյանի հետ, ապա Հովիկ Աբրահամյանի կառավարությունում էր առանցքային դերակատարում ստանձնել, հիմա էլ Կարեն Կարապետյանի մոտ է աշխատելու։ Նորանշանակ վարչապետի կադրային առաջին քայլերից կարելի է եզրակացնել, որ նա կառավարությունը դարձնելու է ծանոթ-բարեկամ-հարազատների հավաքատեղի, դե բնական է, որ անփորձ մարդկանց կառավարությունում պետք է ապահովված լինի արտաքին ֆոնը։ Դավիթ Հարությունյանը կստանձնի կառավարության խոսափողի դերը, անվերջ կխոսի նոր որակի կառավարության հռչակած սկզբունքների մասին, բայց ոչինչ էլ չի ասի ու գործ էլ չի արվի, իսկ Կարապետյանն ինքը կապահովի «գլամուռի» էֆեկտը։ Անի Սահակյան