ՀՀԿ-ում համատարած խլացե՞լ են
Նորանշանակ վարչապետ Կարեն Կարապետյանի անսպասելի հայտարարությունները խառնել էր ՀՀԿ-ականների անդորրը։ Տնտեսության ծանր վիճակի մասին արձանագրումը, նորմալ գործարարների բիզնեսը չխլելու, կախարդական փայտիկի , արագ արդյունքներ չակնկալելու եւ վարչապետի այլ հայտարարությունները պարզվում է շատերին է շոկի մեջ գցել։ Քանզի ՀՀԿ-ում Հովիկ Աբրահամյանի պաշտոնանկությունից հետո ակնկալում էին, որ Հայաստանը մոտ ապագայում Սինգապուրի կվերածվի, իսկ վերածողն էլ լինելու է նոր վարչապետը։ Կարեն Կարապետյանի գովքի համար հերթեր կանգնած ՀՀԿ-ականները նրա բենեֆիսից հետո կարծես հիասթափվել էին եւ բոլորը միաբերան ԱԺ-ում պնդում էին, թե չեն լսել վարչապետի հայտարարությունները։
«Որ մենք շատ արագ մեր տնտեսությունը կփոխենք, այս պահին բոլորին ուզում եմ հայտարարել, նման սպասելիքներ չեն լինելու»,- հիշեցնենք, հենց այսպիսի հոռետեսական տրամադրությամբ իր առաջին ելույթը սկսեց վարչապետ Կարեն Կարապետյանը , ապա հայտարարեց, որ կախարդական փայտիկ չունի, իսկ երկրի տնտեսությունը չափազանց ծանր վիճակում է:
Այսօր պարզվեց, որ ԱԺ պատգամավոր Սամվել Ալեքսանյանը վարչապետից նման խոսքեր չի լսել: «Ո՞վ ա ասում է, որ տնտեսությունը ծանր ա: Ես չեմ լսել, որ Կարեն Կարապետյանն ասել ա»,- զարմացած բացականչում էր պատգամավորը ու փախչում ԱԺ միջանցքի այս ծայրից այն ծայրը։ Աժ նախագահն էլ փախուստի դիմեց ու պատսպարվեց նիստերի դահլիճում, երբ խորհրդարանում լրագրողները հետաքրքրվեցին՝ ինչ նկատի ուներ նորանշանակ վարչապետ Կարեն Կարապետյանը, ով երեկ հայտարարեց, որ այսուհետ հավասար խաղի կանոններ են լինելու, և հաջողակ բիզնեսները չեն խլվելու: Հարցին, թե այսինքն՝ մինչ այս բիզնե՞ս է խլվել Հայաստանում, Գալուստ Սահակյանը պատասխանեց. «Ոչ խլվել է, ոչ դրվել է, ոչ էլ Կարեն Կարապետյանն էնպիսի բան է ասել, որ հիմա ձեզ համար անհասկանալի է»: Այնուհետև Գալուստ Սահակյանը հավելեց. «Նա այդպիսի բան ասած չի լինի, ընդհանուր միտքը պիտի լսեմ: Ես չեմ էլ հասկանում ինչ է ասել»:
Գրեթե նույն ոճի մեջ էր Հերմինե Նաղդալյանը , երբ ուղղեցին նույն հարցը, ինչ Գալուստ Սահակյանին «Ես ընկալեցի վարչապետի հայտարարությունը այն բազմաթիվ վերլուծությունների ու քննարկումների ոգու ներքո, որը մշտապես ունեցել ու հայատարարել է ՀՀԿ-ն: Մենք միշտ սթափ ու օբյեկտիվ գնահատական ենք ունեցել բոլոր խնդիրներին, որ կան մեր տնտեսության մեջ»,-ասաց նա ու շարունակեց «Իհարկե, 25 տարի շրջափակման մեջ գտնվող երկրի տնտեսությունը ծանր վիճակում էր լինելու, իհարկե, փոքր շուկա ունեցող, փոքր գնողական հնարավորություն ունեցող երկրի խնդիրները բավական ծանր են լինելու»: Իհարկե, տիկինը այդպես էլ նույն եռանդով չբացատրեց՝ ինչպես է, որ պատերազմական տարիները անձամբ իր եւ մյուս ՀՀԿ-ականների բիզնեսի կողքով անցել, ինչպես է այս տարիներին նրանց բիզնեսը բարգավաճել, բայց առանց բառ ասելու էլ, բոլորին է դա հայտնի։
Անդրադառնալով վարչապետի՝ հավասար խաղի կանոններ ստղծելու ու բիզնես չխլելու վարաբերյալ հայտարարությանը, Նաղդալյանն ասաց. «Ես չգիտեմ որևէ նման օրինակ և չեմ էլ կարծում, որ ամեն մի բառի տակ, որը դուք լսում եք պաշտոնյաներից, պետք է վերցնել, միկրոսկոպով ուսումնասիրել ու բաներ ման գալ: Մեր հայկական հին ու բարի ավանդույթն է, ասում են՝ եզը վերցնում են, տակը հորթ են ման գալիս: Կարծում եմ, որ վարչապետը նկատի է ունեցել հնարավոր բոլոր հանգամանքները, որ կարող են եղած լինել երբևիցե որևէ երկրում որևէ ժամանակ կամ որևէ նեգատիվ երևույթ կարող էլ լինել ու գոյություն ունենալ: Այդ պահը չեմ լսել, միգուցե ուշադրությունս այլ տեղ է եղել, դրա համար չեմ կարող լավ մեկնաբանել»:
Անի Սահակյան
Հետևեք մեզ Viber-ում
