Ինչո՞ւ է Պուտինը գալու Հայաստան

Սերժ Սարգսյանը սեպտեմբերի 16-ին աշխատանքային այցով մեկնել է Ղրղզստանի Հանրապետություն, որտեղ կայանալու է ԱՊՀ պետությունների ղեկավարների խորհրդի նիստը: ՌԴ նախագահ Վլադիմիր Պուտինը ևս Բիշքեկում  կմասնակցի Անկախ Պետությունների Համագործակցության մասնակից պետությունների ղեկավարների խորհրդի նիստին` հաղորդել է Կրեմլի մամուլի ծառայությունը: «ԱՊՀ կազմավորման 25-ամյակի համատեքստում` պետությունների ղեկավարները կամփոփեն միջպետական միության գործունեության արդյունքները, կարծիքներ կփոխանակեն Համագործակցության հետագա զարգացման առանցքային ուղղությունների շուրջ»: Գագաթնաժողովին իրենց մասնակցությունն են հաստատել նաև` Նուրսուլթան Նազարբաևը (Ղազախստան), Էմոմալի Ռահմոնը (Տաջիկստան), Իլհամ Ալիևը (Ադրբեջան) և Ալեքսանդր Լուկաշենկոն (Բելառուս): Դեռ հայտնի չէ, թե արդյոք, Պուտինը կկազմակերպի Սարգսյան-Ալիև առանձին հանդիպում, ավելի ճիշտ` եռակողմ: Եթե նույնիսկ դա հաջողվի անել, ապա պարզ է, որ դա կլինի սիմվոլիկ մի քայլ: Բայց հայտնի է դարձել, որ ամենայն հավանականությամբ հոկտեմբերին Պուտինը կայցելի Հայաստան` ՀԱՊԿ գագաթնաժողովին մասնակցելու նպատակով, այս մասին ասել է ՀՀ փոխարտգործնախարար Շավարշ Քոչարյանը: Նրա խոսքով, հոկտեմբերին ՀԱՊԿ գագաթաժողովի ժամանակ կհայտարարվի կազմակերպության գլխավոր քարտուղարի իրավասությունների անցումը Հայաստանին: Ավելի վաղ հայտնի էր դարձել, որ այդ պաշտոնը այբբենական կարգով հերթով զբաղեցնելու են ՀԱՊԿ բոլոր անդամ-երկրները, և Հայաստանն այդ ցուցակում առաջինն է:  «Ինչ վերաբերում է Պուտինի այցին, ապա, քանի որ ՀԱՊԿ գագաթնաժողովը նախատեսված է Հայաստանում, հետևաբար մենք ակնկալում են Հայաստանում տեսնել ՀԱՊԿ բոլոր անդամ-երկրների ղեկավարներին», - ասաց Քոչարյանը: Ավելի վաղ ՀԱՊԿ գործող գլխավոր քարտուղար Նիկոլայ Բորդյուժան հայտարարել էր, որ նոր գլխավոր քարտուղարի անունը հայտնի կդառնա հոկտեմբերի 14-ին Երևանում կայանալիք ՀԱՊԿ-ի նիստի ժամանակ: Նրա խոսքով, հավակնորդը Հայաստանի ներկայացուցիչ է: Ինչպես հայտնի է, վերջերս համառ տեղեկություններ են շրջանառվում այն մասին, որ ՀԱՊԿ-ի գլխավոր քարտուղար կնշանակվի ՀՀ պաշտպանության նախարար Սեյրան Օհանյանը: Այն, որ հոկտեմբերին Հայաստանում նախատեսված ՀԱՊԿ գագաթնաժողովի շրջանակներում ՀԱՊԿ պաշտոնական Երևանը բոլոր երկրների ղեկավարներին սպասում է Երևանում, թերևս, սա հիմք է, կարծելու, որ Պուտինն, այնուամենայնիվ, կգա Հայաստան, այսպես ասած` հանդիսավոր կերպով ՀԱՊԿ-ի գլխավոր քարտուղարի նշանակման նպատակով: Բայց Պուտինի քայլը նաև հստակ քաղաքական նպատակներ կունենա: Բանն այն է, որ Հայաստանում հակառուսական տրամադրությունների մեծ ալիք է բարձրացել, ու թերևս, Պուտինի այցը, ինչ-որ առումով, այդ տրամադրությունները ցրելու նպատակ էլ կունենա: Հայաստանում կառավարության փոփոխության արդյունքում` «Գազպրոմ»-ական Կարեն Կարապետյանի նշանակումը վարչապետի պաշտոնում, կարծես, Մոսկվայի համար լրացուցիչ «խթան» է հայ-ռուսական, նկատելիորեն, վտանգված հարաբերությունները վստահության նոր հիմքերի վրա դնելու նպատակով: Գուցե Մոսկվան հասկացել է, որ քիչ անց, կարող է կորցնել Հայաստանի հասարակության վստահությունն առհասարակ, անկախ այն բանից, թե Հայաստան Ռուսաստանից ում են գործուղում վարչապետ, ում վրա էլ որոշակի առաքելություն կարող է դրված լինել` բարձրացնել Ռուսաստանի նկատմամբ վստահությունը տարբեր քայլերով, օրինակ` գազի գների նվազումից սկսած... Թամար Բագրատունի