Երևանի կոշտ պահանջն ու արձանագրված փակուղին
Հասունացել է այն պահը, որ պետք է լրջորեն նայել Լեռնային Ղարաբաղի հակամարտության կարգավորման հարցով նախկինում կատարված բոլոր համաձայնություններին, լրագրողների հետ զրույցում ասել է Հայաստանի փոխարտգործնախարարի պաշտոնակատար Շավարշ Քոչարյանը: «Ապրիլյան՝ Ադրբեջանի կողմից նախաձեռնված ագրեսիայից հետո արդեն լրջորեն պետք է մտածել այդ բոլորի մասին: Ժամանակին եղել էր շատ լուրջ, կարելի է ասել, զիջում՝ ընդունելով որպես հիմք բանակցությունների համար Մադրիդյան սկզբունքները, [Ղարաբաղի] հետաձգված հանրաքվեն, որովհետև այն ժամանակ շատ հստակ հիմնավորում էին միջնորդները, որ հետաձգված հանրաքվեի իմաստը կայանում է նրանում, որ Բաքվի իշխանությունը կարողանա իր ժողովրդին նախապատրաստի այն մտքին, որ Ղարաբաղը չի լինելու Ադրբեջանի կազմում: Բայց նրանք այդ ժամանակն օգտագործեցին ճիշտ հակառակ ուղղությամբ: Այդ տեսակետից արդեն հասունացել է այն պահը, որ պետք է լրջորեն նայել բոլոր նախկինում կատարված համաձայնություններին», - ասել է Քոչարյանը: Անդրադառնալով Մինսկի խմբի համանախագահ Ջեյմս Ուորլիքի հայտարարությանն այն մասին, թե Ղարաբաղի խնդրի կարգավորումը ենթադրում է որոշ շրջանների վերադարձ Ադրբեջանին՝ Ղարաբաղի կարգավիճակի դիմաց, Քոչարյանն ընդգծեց, որ նա, ըստ էության, որևէ նոր բան չի ասել. «Նա ընդամենը վերաշարադրել է այն, ինչ որ կա Մադրիդյան սկզբունքներում»: Քոչարյանը նաև ընդգծել է, որ այն հանգամանքը, որ Վիեննայի ու Սանկտ Պետերբուրգի համաձայնությունները կյանքի չեն կոչվել հենց պատճառ է հանդիսանում, որ «բուն բանակցային գործընթացում չի կարող լինել առաջընթաց». «Ամեն ինչ կախված է Վիեննայում ու Սանկտ Պետերբուրգում ձեռք բերված պայմանավորվածությունների իրականացումից: Հիմա քննարկման առարկա է այն հանգամանքը, որպեսզի ամրապնդվի կրակի դադարեցման ռեժիմը, վերջ դրվի այն դիվերսիաներին, որն իրականացնում է Ադրբեջանը, ուժեղացվի այդ մոնիտորինգային խմբի կարողությունները և այլ, որովհետև շատ ակնհայտ է՝ առանց դրա խոսել բանակցային գործընթացի մասին անհնար է»: Այսպիսով, պաշտոնական Երևանն արձանագրել է, որ ԼՂ-ի կարգավիճակի հարցում հայկական կողմը զիջումների չի գնալու, այն է` Արցախը չի կարող լինել Ադրբեջանի կազմում, և Ալիևը պետք է իր հասարակությանն ընտելացնի այս մտքի հետ: Բացի այդ, պաշտոնական Երևանն արձանագրել է փաստը, թե ինչ փակուղում է գտնվում այսօր ղարաբաղյան բանակցային գործընթացը` կրկին Ալիևի պատճառով: Պաշտոնական Բաքուն ուղղակի չի կատարում Վիեննայում ու Սանկտ Պետերբուրգում ձեռքբերված պայմանավորվածությունները, որոնք ինչպես հայտնի է, վերաբերում են սահմանային միջադեպերի ուսումնասիրությանն ու ԵԱՀԿ Մոնիտորինգի կազմի ընդլայնմանը: Ապրիլյան պատերազմից հետո, պաշտոնական Երևանը էականորեն կոշտացրել է դիրքորոշումը: Այդ դիրքերից նահանջել, իսկապես, վտանգավոր է: Պաշտոնական Բաքուն ապրիլյան քառօրյա պատերազմից հետո պետք է գիտակցի մեկ բան, որ` Արցախը կորցրել է ընդմիշտ: Մետաքսյա Շալունց