Ներկրվող մեքենաների նվազման հետևանքով պետբյուջեն կորցրել է 5 մլն դոլար

«168 ժամ» թերթը գրում է. «ՀՀ պետական եկամուտների կոմիտեն վերջերս տեղեկանք էր հրապարակել՝ հունվար-օգոստոսին հավաքագրված հարկերի վերաբերյալ։ Այդտեղ նշվում էր, որ ընթացիկ տարում պետական բյուջեի հարկային եկամուտների աճի տեմպի վրա ազդող հիմնական գործոնների թվում է ներմուծումների ծավալների անկումը և ներմուծումների կառուցվածքի փոփոխությունը, հատկապես՝ երրորդ երկրներից մարդատար ավտոմեքենաների ներմուծումների մասով։ Երրորդ երկրներ ասելով՝ ՊԵԿ-ը նկատի ունի ԵՏՄ անդամ չհանդիսացող երկրները, որտեղից ներկրված մեքենաների մաքսազերծման համար վճարվում է 20% ՍԱՀ և 10% մաքսատուրք։ ՀՀ ՊԵԿ մաքսային ծառայության տվյալներով՝ 2015 թվականի առաջին կիսամյակում Հայաստան է ներկրվել 11.500 հատ մարդատար ավտոմեքենա, որի մաքսային արժեքը կազմել է 64.5 մլն դոլար։ Այս տարվա առաջին կիսամյակում ներկրված մեքենաների քանակը 6.800 է, մաքսային արժեքը՝ 33.4 մլն դոլար։ Այսինքն, բնեղեն արտահայտությամբ՝ ՀՀ ներկրվող մեքենաները նվազել են 40.8%-ով, իսկ գումարային արտահայտությամբ՝ 48.2%-ով։ Ներկրված 6.800 մեքենաներից 6.500-ը երրորդ երկրներից են, որոնց ընդհանուր մաքսային արժեքը մոտավորապես 29.8 մլն դոլար է։ 2015-ի առաջին կիսամյակում երրորդ երկրներից ներկրվել է ավելի քան 9700 մեքենա՝ 55 մլն դոլար մաքսային արժեքով։ Սա նշանակում է, որ երրորդ երկրներից ներկրված մեքենաների ներկրումը՝ գումարային արտահայտությամբ, նվազել է ավելի քան 25 մլն դոլարով։ Սա էլ իր հերթին՝ նշանակում է, որ պետբյուջեն միայն ԱԱՀ-ի մասով կորցրել է 5 մլն դոլար, որը կստացվեր 25 մլն-ի հարկումից»։ Մանրամասն՝ թերթի այսօրվա համարում։