Տրագիկոմեդիա

Հայաստանի 14-րդ վարչապետ Կարեն Կարապետյանի բեմելը խորհրդարանում անցավ տրագիկոմեդիկ մթնոլորտում: Հովիկ Աբրահամյանի հրաժարականից հետո պաշտոնաթող ու ժամանակավոր նախարարները դաժան սպասումների մեջ ԱԺ էին եկել, նրանց մեծ մասը գաղտագողի, Գալուստ Գրիգորիչի աշխատասենյակով ներթափանցեցին նիստերի դահլիճ, որպեսզի հեռու մնա լրագրողներից, իրենց մի բառ խոսքով չվնասեն հետագա պաշտոնավարման հույժ կարեւոր հարցին: Նախարարների անհաղորդ ու  տրագիկ դեմքերի ֆոնին Կարեն Կարապետյանն էլ ավելի լուսավոր էր թվում, լայն ժպիտը սկզբում չէր իջնում նորանշանակ վարչապետի դեմքից մինչեւ այն պահը, երբ հերթը հասավ իրեն: Օրենսդիրները հարցեր ունեին Կարեն Կարապետյանին, ԲՀԿ-ն անընդհատ գրոհում էր, ՕԵԿ-ը ձեռքի հետ շողոքորթում, գովաբանում, քանզի նա եկել էր փոխարինելու Արթուր Բաղդասարյանի ու նրա ՕԵԿ-ի ոխերիմ Հովիկ Աբրահամյանին, իսկ Կարապետյանն էլ սալվադորյան ոճով կտրուկ պատասխաններ տալիս՝ հարուցելով հակառակորդների զայրույթը: ԲՀԿ խմբակցության պատգամավոր Տիգրան Ուրիխանյանը հետաքրքրվեց՝ եթե Կարեն Կարապետյանին որոշ ժամանակ հետո ռուսական լավագույն ընկերություններից առաջարկվի տնօրենների խորհրդում բավական բարձր աշխատավարձով աշխատանք, արդյոք Կարեն Կարապետյանը կհամաձայնի՞ և կփոխի՞ աշխատավայրը: «Իսկ եթե ոչ, ապա արդյոք Դուք տիրապետո՞ւմ եք ՀՀ բյուջեի միջոցների գոյացմանը և այլ ֆինանսական ցուցանիշներին»: Ննորանշանակի պատասխանը. «Ձեր հարցի մեջ մի ենթադրություն կա, որ ես Երևանի քաղաքապետի պաշտոնից գնացել եմ այլ՝ բարձր աշխատավարձով աշխատանքի, բայց եթե դուք հիշում եք, իմ հարցազրույցի մեջ դա այդպես չի նշվել: Երկրորդ՝ այսօր ես տեղափոխվել եմ ՀՀ վարչապետի պաշտոնին՝ այդ եկամուտների տեսակետից շատ ավելի ցածր աշխատավարձով: Ինչ վերաբերում է՝ տիրապետում եմ ես ամբողջ թվերին՝ մակրոտնտեսական, ոչ: Եթե ՀՀ-ի վարչապետը պետք է լինի միայն այն մարդը, ով տիրապետում է, նշանակում է, որ կառավարության շենքից բացի մենք ոչ մի այլ տեղից վարչապետ չպիտի վերցնենք»,- տեղը դրեց Կարեն Կարապետյանը:  ՀՀԿ-ականներին նա ուղղակի հուժկու հարված հասցրեց՝ նախ արձանագրելով, որ Հայաստանի տնտեսության վիճակը չափազանց ծանր է, բայց արագ փոփոխության հույս ունենալ պետք չէ, քանի որ չկա կախարդական փայտիկ, հարկավոր է համակարգային փոփոխություն: Կարեն Կարապետյանի խոսքն առաջին հերթին հավանաբար ուղղված էր այն հանրապետականներին, ովքեր հայտարարում էին, կամ սկսել էին հայտարարել, թե նա Հայաստանը կդարձնի Սինգապուր, որ նա լայն կապեր ունե ողջ երկրագնդում, ամբողջ մոլորակում: Մենք առիթ ունեցել ենք այդ մասին խոսելու, որ ՀՀԿ-ում հերթեր են գոյացել, որպեսզի գովեստի խոսքեր ուղղեն նորանշանակ վարչապետին, Վազգեն Կարախանյանն էլ չտարավ-չբերեց, բացահայտեց, որ Կարապետյանը կապեր ունի ամբողջ մոլորակում: Կարեն Կարապետյանը համակարգային փոփոխությունների անհրաժեշտությունից խոսեց Լյուդմիլա Սագսյանի հարցին ի պատասխան: Հովիկ Աբրահամյանի հովանու ներքո հայտնված տիկինը սկզբում կծող, հետո քծնող ելույթով երեւի թե  փորձեց նախորդից ստանալիքը վերցնել նորանշանակից: Լյուդմիլա Սարգսյանը նախ պահանջեց Կարապետյանին ներկայացնել իր ծրագրերը, ապա նրա ելույթից եզրակացրեց , որ փաստորեն տնտեսության արագ վերականգնման հետ կապված որեւէ հույս չունենանք: Նա հորդորեց գոնե ինչ-որ հուսադրող բան ասել, թե ինչ է անելու, որ մարդիկ զգան նոր կառավարություն է եկել: Կարեն Կարապետյանը հիշեցրեց՝ 1.5 օր է, ինչ վարչապետ եմ ծանոթանում եմ մակրոտնտեսական ցուցանիշներին. «Մենք կոնկրետ քայլեր ենք ձեռնարկելու եւ սոցիալական լարվածության մեղմելու եւ բիզնեսի զարգացման: Բայց պետք է հասկանանք որ կախարդական փայտիկ չկա: Բաց, ազնիվ ասում եմ, ռեալ մեր տնտեսության վիճակը չափազանց ծանր է: Համակարգային փոփոխություններ են պետք»: ՀԱԿ խմբակցության պատգամավորուհին ժպիտով համաձայնություն տվեց: Հ.Գ.-Կարեն Կարապետյանի բեմելն այնքան էլ բարեհաջող չանցավ, նա հաճախ էր ասում, որ ինքը չի տիրապետում տվյալ խնդրին, երբեմն աղմկոտ հայտարարություններ անում ոմանց բիզնեսը չխելելու եւ նախկին կառավարության այլ թերությունների մասին՝ ընդգծելով իր անտեղյակությունը: Վարչապետ նշանակելիս բոլորը խոսում էին, թե արագացված տեմպերով բարեփոխումներ են հարկավոր, մինչդեռ Կարեն Կարապետյանին դեռ ժամանակ է պետք նախ իրավիճակին ծանոթանալու, հետո խնդիրները լուծելու համար: Անի Սահակյան