Նորից ոտքը «գազին» են դրել

Ներիշխանական վայրիվերումներն ու Հովիկ Աբրահամյանի հրաժարականը ուղիղ արտացոլանք է գտել ընդդիմադիր հատվածում, որը ցայտուն կերպով դրսեւորվում է խորհրդարանում Գլխավոր դատախազի թեկնածուի քննարկման ընթացքում։ Հովիկ Աբրահամյանին վարչապետի պաշտոնին հասցրաց ոչ իշխանական ուժերը եւ հատկապես՝ ԲՀԿ-ն ու ՀԱԿ-ը ավելի ընդդիմադիր են դարձել։ Գեւորգ Կոստանյանի նկատմամբ ընդգծված դրական վերաբերմունք ունեցող այս երկու ուժերը, որոնք պախարակվեցին Կոստանյանի քվեարկությունից հետո, այսօր դարձել են Արթուր Դավթյանի անխնա քննադատները։ ՀԱԿ-ը Գեւորգ Կոստանյանին մինչդեռ որոշել էր շանս տալ, արդյունքում Կոստանյանի քվեարկության ժամանակ ընդամենը երեք դեմ ձայն ստացվեց։ Այսօր այդ կուսակցությունները բոյկոտելու են գլխավոր դատախազի քվեարկությունը։ Փոխարենը ՕԵԿ-ը եւ մյուս ոչ իշխանականները կմասնակցեն։ Գրեթե նույն պատասխանն էր տվել նաեւ Գեւորգ Կոստանյանը Մարտի 1-ի հետ, քաղբանտարկյալների ու այլ հարցերի հետ կապված։ Ի դեպ, այսօր Արամ Մանուկյանը Դավթյանին ասաց, որ հարյուրավոր ժամ տեսանկարահանված նյութեր կան, բայց դրանք չեն տրվում փաստաբաններին եւ զոհերի ծնողներին: Հետո Արամ Մանուկյանը հրապարակեց, թե կառավարությունը, նույն դատախազությունն ինչ են պատասխանել Մարդու իրավունքների եվրոպական դատարանի՝ Մարտի 1-ի գործով. «Բառացիորեն գրված է՝ մահաբեր ուժը, որը կիրառվել է Մարտի 1-ի 9 զոհերի նկատմամբ, եղել է բացարձակապես անհրաժեշտ: Ի՞նչ անհրաժեշտության մասին է խոսքը: Այս հարցին պետք է դատախազությունը պատասխանի: Եթե այդպես է, ապա ովքե՞ր են կրակողները, ի՞նչ մոտիվացիայով է կատարվել: Եթե հայտնի չի ովքեր են կազմակերպիչները, հրահանգողները, ինչպե՞ս եք այդպիսի բացատրություն ուղարկել եվրոդատարանին: Պետք է հիմնավորել մահվան ուժ կիրառելու բացարձակ անհրաժեշտությունը»: Իր ելույթի վերջում Արամ Մանուկյանն ասաց, որ Արթուր Դավթյանին չեն հավատում, որովհետեւ նա մտնում է համակարգ, իր պատվեր տվողներն են ամեն ինչ որոշելու, ուստի որոշել են չմասնակցել քվեարկությանը: Իսկ ահա, ԲՀԿ ղեկավար Նաիրա Զոհրաբյանի ելույթի առյուծի բաժինը նվիրված էր Հովիկ Աբրահամյանին, ավելի ճիշտ Կարեն Կարապետյանի նկատմամբ այս օրերին դրսեւորվող քծնանքին։ Նա գլխավոր դատախազի թեկնածուին շնորհավորեց, որ ի տարբերություն Կարապետյանի իր համար հերթեր չեն կանգնել, որպեսզի քծնեն, գովաբանեն։ Զոհրաբյանն ասաց, որ չի հավատում մեկ մարդու փրկչական միսիոներությանը։ Միևնույն ժամանակ, Նաիրա Զոհրաբյանը նշեց, որ ԲՀԿ-ն հետևելու է գլխավոր դատախազի պաշտոնում Արթուր Դավթյանի գործունեությանը և, եթե իրենք նկատեն, որ նա իսկապես լավ է աշխատում, կողջունեն: «Եթե մենք զգանք, որ դուք արդյունավետ պայքար եք մղում արատավոր երևույթների դեմ, մենք դա կողջունենք»,– ասաց ԲՀԿ խմբակցության ղեկավարը: Մեծ հաշվով ոչինչ չի փոխվել երկրում, ավելին նույն ՀԱԿ-ն ու ԲՀԿ-ն Կոստանյանի գլխավոր դատախազ նշանակվելուց հետո էլ ավելի սերտ շփումների մեջ են իշխանությունների հետ։ Թե ինչու են ընդդիմադիրները նորից ոտը գազին դնում, ցույց կտա ժամանակը։ Անի Սահակյան