«Զուգարանային կրքեր» ուղիղ հեռարձակմամբ ցույց տա՞նք. Ն. Փաշինյան

Այսօր Ազգային ժողովում քննարկվում է Հեռուստատեսության և ռադիոյի ազգային հանձնաժողովի անդամ ընտրելու հարցը։ Թեկնածու Տիգրան Հակոբյանը նշեց, որ ինքն ուզում է մասնակից լինել Հայաստանի էլեկտրոնային մեդիայի զարգացմանը, կարող է հասարակության լայն շերտերի հետ լուծել այն խնդիրները, որոնք կանգնած են այսօր զանգվածային լրատվամիջոցների առաջ։Նիկոլ Փաշինյանը ՀՌԱՀ անդամի թեկնածու Տիգրան Հակոբյանին հարց ուղղեց «Կիսաբաց լուսամուտներ» հաղորդման տեսարանների ու բառապաշարի մասին. «Մի նախադասություն հնչեց, որ չգիտեմ…ինձ թույլ չեմ տա բարձրաձայնել: Դա պոռնո մտածողության ամենալկտի եւ բոլոր տրամաբանության, նորմալ հարաբերակցության կանոնակարգերին դեմ է: Ուզում եմ պատկերացնել ձեր գործողությունները՝ այս կարգի նախադասություններ լսելիս եւ այս կարգի հաղորդումների նկատմամբ, որտեղ բանավոր պոռնո տեսարաններ են նկարագրվում»: Հակոբյանը նշեց, որ այդտեղ լուծելու խնդիր կա, բայց ասաց, որ ինքն այդ հաղորդումը չի նայել, ու կոնկրետ դեպքի մասին դժվար է խոսելը։ Նրա խոսքով՝ միշտ դիսբալանս կա հասարակության տարբեր շերտերի պահանջի  և հեռուստատեսության ազատության միջև։ «Հեռուստատեսության ֆունկցիաներից մեկը նաև իրականության ռեպրեզենտացիան է հասարակությանը։ Ես ինչքանով նայել եմ այդ «Կիսաբաց լուսամուտները, դա կարող է մեզ դուր գալ կամ չգալ, բայց այն ցույց է տալիս այն շերտերը, որոնք Հայաստանում իրականություն են, ընդհանրապես արգելել այդ բաները՝ կնշանակի՝ ստեղծել ոչ իրական զուգահեռ պատկեր, որը կսահմանափակի մեր՝ օբյեկտիվ  տեղեկատվություն ստանալու իրավունքը։»,- նկատեց Տ. Հակոբյանը։ Փաշինյանն անընդունելի համարեց Տ. Հակոբյանի պատասխանը. «Մարդկանց տներում շատ բաներ են լինում, այդ թվում՝ ննջարաններում և զուգարաններում, բայց ի՞նչ անենք, հաղորդո՞ւմ պատրաստենք այդ մասին։ Դուք խոսում եք գրաքննության մասին, հիմա ՀՀ-ում կարող է լինեն հաղորդումներ՝ «զուգարանային կրքեր», ու ուղիղ հեռարձակմամբ ցույց տան՝ այնտեղ ինչ է կատարվում։ Սա նշանակում է՝ մենք հասարակության ամենաներքևի շերտերը բերում ենք էկրան»։