«Քոչարյանը թիմ չունի, նա պարզապես ստիպել է, որ բոլորը աշխատեն»
Վարչապետ Հովիկ Աբրահամյանը հրաժարական է ներկայացրել․ գրեթե երկուս ու կես տարի վարչապետի աթոռը զբաղեցրած վարչապետը հրաժարական տալու իր մտադրությունը հիմնավորեց. «Չնայած ամենօրյա աշխատանքով և սահմանին կանգնած զինվորի անսասան արիությամբ կերտվող 25-ամյա մեր հպարտ անկախությանը, մենք դեռևս անցումային խնդիրներ ունեցող երկիր ենք, որտեղ առկա տնտեսական և սոցիալական իրավիճակի բարելավման համար մեզ անհրաժեշտ են հասարակության և կառավարության միասնական ջանքեր: Իսկ դրա համար անհրաժեշտ են նոր մոտեցումներ, նոր սկիզբ: Այդ պատճառով, ես որոշել եմ հրաժարական տալ և նոր կառավարություն ձևավորելու հնարավորություն ընձեռել նախագահին: Պետք է մտածել մեր բոլորի հաջողության մասին և շանս տալ նոր կառավարությանը՝ կատարված աշխատանքի հիման վրա և նոր մոտեցումներով համախմբելու հասարակությանը», - հայտարարեց Աբրահամյանը: Նոր դեմքերի ու սկզբունքների անհրաժեշտության մասին խոսեց նաեւ ՀՀ նախագահ Սերժ Սարգսյանը, երբ ՀՀԿ խորհրդի նիստում ներկայացրեց նոր վարչապետի թեկնածու Կարեն Կարապետյանին: Սոցիոլոգ Ահարոն Ադիբեկյանի կարծիքով իրականում Հովիկ Աբրահամյանի հրաժարականն ու նոր վարչապետի թեկնածությունը ցույց են տալիս, որ խնդիր կա էլ ավելի ամրապնդվելու Եվրասիական տնտեսական միությունում.«ԵԱՏՄ-ում էլ ավելի խորը ինտեգրվելու խնդիր ունենք, ու հարկավոր է դեմք, որը ավելի խորը կապեր ունի այդ միությունում, այդ կողմում: Իսկ մենք գիտենք, թե Կարեն Կարապետյանը վերջին տարիներին ինչ պաշտոններ է զբաղեցրել, Գազպրոմում միջազգային կապերի վարչության պետն է եղել, նա նաեւ փորձված է քաղաքական էլիտայում, նոր մարդ չէ, երեւի դրանով է բացատրվում այս փոփոխությունը»,- ասաց Ահարոն Ադիբեկյանը: Նրա համար այդ խնդիրները Հովիկ Աբրահամյանը անկարող էր լուծել, թե ինչու, Ադիբեկյանը չպատասխանեց, փոխարենն ասաց.«Մինչդեռ Կարեն Կարապետյանը իր կապերը ԵԱՏՄ-ում խոդ է տալու, որպեսզի կարողանանք այս ճգնաժամից դուրս գանք»: Ըստ Ադիբեկյանի՝ կան օբյեկտիվ պատճառներ ռադիկալ փոփոխությունների գնալու համար. «Պետք է անհապաղ քայլեր անել, որ արտագաղթը նվազեցվի, թե չէ կստացվի այնպես, որ Հայաստանում այլեւս մարդ չի մնա, կամ կմնա նվազագույն թվով մարդ ու մենք այլեւս հետաքրքիր չենք լինի ո՛չ ներդնողների համար, ո՛չ էլ՝ որեւէ մեկի: Մեր երկրի առջեւ խնդիրներ են ծառացած, բանակ պիտի պահենք, երեխա ունենանք, պաշտպանենք մեր սահմանները, Ղարաբաղին օգնենք: Սրանք լուրջ խնդիրներ են, հետեւաբար տնտեսական կայունություն պետք է ապահովել, պետք է գա մեկը, որ այս պայմաններում այդ տնտեսական զարգացումն ապահովի»: Այս փոփոխություններով ու թեկնածուների ով լինելու հանգամանքով պայմանավորված գերիշխում է տեսակետը, որ իշխանության են վերադառնում Ռոբերտ Քոչարյանի շրջապատի մարդիկ, օրինակ Արմեն Գեւորգյանը եւ այլք: Այս լուրերին անդրադառնալով Ադիբեկյանը նկատեց, որ Քոչարյանը թիմ չունի. «Խոսել Քոչարյանի մարդկանց մասին, անիմաստ է, որովհետեւ Քոչարյանը մենակ է եկել իշխանության, ավելի ճիշտ՝ Սերժ Սարգսյանի հետ միասին: Նա կարողացել է որոշակիորեն թիմ ստեղծել, միջազգային հանրության առջեւ կարողացել է հանդես գալ որպես բազե՝ կայուն, պինդ, որի վրա կարելի է հենվել, որի հետ կարելի է կայուն կապեր հաստատել եւ նրա օրոք էր, որ մենք ունեցանք կայուն տնտեսական աճ, բյուջեն եռապատկվեց, ՀՆԱ-ն եռապատկվեց, ինչը դրական էր: Ամեն դեպքում դա իր թիմը չէր: Թիմ ունենալու համար պետք է այստեղ մեծանաս, կապեր ունենաս եւ կուսակցական եւ ընկերական: Նա պարզապես կարողացավ բոլորին աշխատեցնել: Որքանով ես գիտեմ նրա հետ աշխատելը դյուրին չէր, նա կամային է, կոպիտ»,- ասաց Ահարոն Ադիբեկյանն՝ ընդգծելով, որ հիմա մարտահրավերներն այլ են, Ռուսաստանի դերակատարությունն է ըստ նրա մեծացել, որն ուզում է եւ մեր երկրի, եւ Ադրբեջանի հետ «ախպերություն» անել. «Դրա համար մեր թուլությունը մեր տնտեսական թուլությունն է, ինչի ամրապնդման խնդիրն է դրված»: Անի Սահակյան