Իսկ ի՞նչ է ստանալու Պուտինը Ղարաբաղում
ԵԱՀԿ Մինսկի Խմբի համանախագահները երեկ Ռուսաստանի արտգործնախարար Սերգեյ Լավրովի հետ քննարկել են Լեռնային Ղարաբաղի կարգավորման հարցը: ՌԴ ԱԳՆ-ի տարածած հաղորդագրության համաձայն ԵԱՀԿ Մինսկի խմբի՝ Ռուսաստանի, Ֆրանսիայի և ԱՄՆ-ի համանախագահներ Իգոր Պոպովը, Պիեր Անդրիոն և Ջեյմս Ուորլիքը, ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը Լավրովի հետ քննարկել են ԼՂ կարգավորման խնդիրը, այդ թվում մայիսի 16-ին Վիեննայում և հունիսի 20-ին Սանկտ Պետերբուրգում ձեռք բերված պայմանավորվածությունների իրականացման հարցը: Կողմերն անդրադարձել են նաև հայ-ադրբեջանական շփման գծում ներկայում տիրող իրավիճակին: Ռուսաստանի արտգործնախարարի մամուլի խոսնակ Մարիա Զախարովան ճեպազրույցում նշել է, որ խորհրդակցությունները շարունակվում են: Ռուսաստանյան ԶԼՄ-ների հաղորդմամբ՝ Զախարովան հայտարարել է, որ համանախագահների միջև խորհրդակցությունները շարունակվում են, և դրանց արդյունքների մասին կհրապարակվի հավելյալ տեղեկատվություն: Իսկ ադրբեջանական գործակալությունների փոխանցմամբ՝ Ադրբեջանի արտգործնախարար Էլմար Մամեդյարովը հանդիպել է Ֆրանսիայի՝ եվրոպական հարցերով պետնախարար Հառլեմ Դեզիրի հետ: Ըստ Ադրբեջանի ԱԳՆ մամլո ծառայության` հանդիպման ժամանակ կողմերը քննարկել են Ղարաբաղյան հակամարտության կարգավորման վերաբերյալ բովանդակային բանակցային գործընթացի ներկայիս վիճակը: Կողմերն ընդգծել են բովանդակային բանակցային գործընթացի արագացման կարևորությունը: Իսկ Մամեդյարովն ընդգծել է, որ Ադրբեջանը մշտապես կողմ է եղել բովանդակային ու արդյունավետ բանակցությունների անցկացմանը՝ հակամարտության շուտափույթ կարգավորման հասնելու համար: Ամերիկացի համանախագահ՝ Ջեյմս Ուորլիքը մոսկովյան հանդիպման նախօրեին «Թվիթերում» «Խաղաղությունը Ղարաբաղում հնարավոր է» գրառում էր արել: Հիշեցնենք, որ Հայաստանի և Ադրբեջանի նախագահները վերջին անգամ հանդիպել էին հունիսի 20-ին Սանկտ Պետերբուրգում եռակողմ ձևաչափով, Ռուսաստանի նախագահի նախաձեռնությամբ և մասնակցությամբ։ Նախատեսված էր ևս մեկ հանդիպում ամռանը Ֆրանսիայում, սակայն այն ինչ-ինչ պատճառներով չէր կայացել: Սակայն, այսօր, ակնհայտորեն նախաձեռնողը բանակցային գործընթացում Մոսկվան է: Այսինքն, Մոսկվան նոր հանդիպում կազմակերպելու առաքելությամբ է հանդես գալիս: Ի դեպ, խոսակցություններ կային, որ օգոստոսին Սարգսյան-Ալիև ևս մեկ հանդիպում է կազմակերպելու, բայց այն տեղի չունեցավ: Ինչու՞: Սկզբում Ֆրանսիայի միջնորդության մասին էր խոսվում: Այժմ էլ պարզ չէ, թե Մոսկվայի նախաձեռնած հանդիպումը երբ կկայանա: Բայց ոչ այնքան ժամկետն է հետաքրքիր, այլ այն, թե ինչ «ծրագրով» է Մոսկվան ցանկանում հանդիպում կազմակերպել: Պարզ է, որ ռուսական կողմն այսօր չի ցանկան հանդիպում կազմակերպել միայն «պտիչկա» դնելու համար: Ակնհայտորեն Մոսկվան կձգտի արդյունք ապահովել` գոնե համատեղ հայտարարության տեսքով: Բացի այդ, առավել կարևոր է հարցը, թե ի՞նչ է ստանալու ինքը՝ Վլադիմիր Պուտինը: Խաղաղապահների տեղակայում Լեռնային Ղարաբաղո՞ւմ... Այստեղ է, որ առաջ է գալիս հաջորդ հարցը` իսկ արդյոք Միացյալ Նահանգները դա թույլ կտա՞ն: Ու ոչ միայն ԱՄՆ-ը, իսկ Իրա՞նը, Թուրքիա՞ն, ինչպե՞ս կարող են այդ գաղափարին վերաբերվել: Վստահաբար, նրան ոչ ծափողջույններով կընդունեն ռուսական այդ ծրագիրը: Մետաքսյա Շալունց