Պուրակ մտնելով՝ հատում եք բաժանարար գիծը. Պենտագոնում հիշում են ահաբեկչության զոհերին

Ամերիկայի ձայն 15 տարի առաջ Պենտագոնի դեմ ինքնաթիռով իրականացված ահաբեկչության արդյունքում ինքնաթիռի 59 ուղեւորներ եւ շենքում գտնվող 125 աշխատակիցներ էին զոհվել: Ողբերգության զոհերի հիշատակին է նվիրված Պենտագոնում կառուցված հիշատակի պուրակը: Լրագրող Ջեյմի Մաքինթայրի համար, ով այդ օրերին լուսաբանում էր ահաբեկչությունն ուղիղ եթերում, պուրակը հատուկ կարեւորություն ունի. «Գիտեք, սա կարծես սրբատեղի լինի: Սեպտեմբերի 11-ին ես հենց այստեղ էի, եւ այս ամենի միջով անցած ցանկացած մեկի համար դա կյանքի շրջադարձային պահ է»: Պենտագոնի հիշատակի պուրակի նախագահ Ջեյմս Լայչակը 15 տարի առաջ տեղի ունեցած ողբերգության արդյունքում կորցրել էր եղբորը. «Իմ եղբայր Դեյվը, կրտսեր եղբայրս, զոհվել է Պենտագոնում սեպտեմբերի 11-ին, եւ ես սա անում եմ եղբորս պատվին, ինչպես նաեւ մյուս զոհերի հիշատակը պահելու նպատակով»: Լայչակի խոսքով, պուրակը հատուկ ճարտարապետություն ունի. «Պուրակ մտնելով՝ հատում եք բաժանարար գիծը. Սա ահաբեկչության պահն է՝ 2001 թվականի սեպտեմբերի 11-ի առավոտյան 9.37 րոպե: Այս գծին ամենամոտ կանգնած նստարանը 1998 թվականի հորիզանականի վրա է գտնվում: Այն նվիրված է երեք տարեկան Դանա Ֆալկենբերգին, ով ծնողների հետ ինքնաթիռում էր գտնվում: Այս նստարանը դեպի երկնքն է ուղղված՝ խորհրդանշելով երկնքում Դանայի մահը»: Ջեյմսի եղբոր՝ Դեյվի հիշատակին նվիրված նստարանը գտնվում է 1961 թվականի հորիզոնականում եւ ուղղված է դեպի Պենտագոն, որտեղ զոհվել էր Դեյվը: Այսպիսով, 2001-ի բաժանարար գծից կարելի է տեսնել ահաբեկչության բոլոր զոհերի հուշարձանները, իսկ թանգարանում՝ ծանոթանալ զոհերի հիշատակի հավերժացմանն ուղղված գործունեությանը: