«Հոգևոր Հայաստան». այո՛, սրա անհրաժեշտությունը կա. Տիգրան Մանսուրյան

Կոմպոզիտորների միությունում այսօր «Հոգևոր Հայաստան» համահայկական հիմնադիր համաժողովն անցկացվեց՝ հասարակական, քաղաքական գործիչների ու մտավորականների մասնակցությամբ: Կոմպոզիտոր Տիգրան Մանսուրյանը համաժողովի ծրագիրը սրտին շատ մոտ համարեց ու ասաց. «Մենք հաճախ անցնում ենք ընդվզումների միջով, լուրջ ցավերի միջով, Աստծո տված չարչարանքից ավելի ցավի միջով, և ինչքան շատ են դրանք մեր շուրջը:  Երբեմն, դրա հետ ու արդյունքում գոյանում է չարությունը, որն իմ խորին համոզմամբ, հազիվ, թե մեզ իսկապես առաջնորդող հանդիսանա, քանի որ մենք՝ հայերս, աստվածատուր ժողովուրդ ենք և մեր ճակատագիրն ու ճանապարհն անցել է խոնարհումով, համբերությամբ, և երբ այդ հիմքի վրա գոյանում է «հոգևոր Հայաստան» արտահայտությունը, ես ասում եմ՝ այո՛, սրա անհրաժեշտությունը կա»:  Տիգրան Մանսուրյանն ասաց, որ երջանիկ է Աշոտ Պետրոսյանին «Դատապարտյալների հիվանդանոցում» այցելելու համար: «Մինչ այդ նրան չգիտեի: Ես իրեն հարցրեցի՝ դու գիտե՞ս, որ քո ուսուցիչը՝ Սամվել Պետրոսյանը, հրաշալի ընտանիքի զավակ էր: Երբ նա պառկած էր հիվանդանոցում, մենք երկու ժամ զրուցեցինք: Ես հարցրի՝ դու քո ուսուցչի հոր մասին որևէ բան գիտե՞ս, ասեց՝ չէ: Ասացի՝ կարևոր է իմանալը, որովհետեւ նա եթե քեզ ասեր, դու կիմանայիր, որ իր հայրը հայ ազգային ազատագրական պայքարի զինվորներից էր, հրամանատար, որի մոտ զինվոր է եղել Եղիշե Չարենցը: Երկու էջանոց հրաշալի հուշ-գրություն ունի Բարդուղ Պետրոսյանը՝ զինվոր Չարենցի մասին: Շատ հուզիչ էր այդ ամենը: Սա, հավատացած եմ, մի ամբողջություն է, այդ զինվորը, Չարենցը, այդ հիվանդանոցը, Աշոտի հետ մեր զրույցը», - պատմեց Տ.Մանսուրյանը: