Մամիաշվիլին պաշտոն է ստացել Ըմբշամարտի միջազգային ֆեդերացիայում

Ռուսաստանցի ըմբշամարտի ֆեդերացիայի նախագահ Միխայիլ Մամիաշվիլին նշանակվել է Ըմբշամարտի միջազգային ֆեդերացիայի (United World Wrestling) տեխնիկական կոմիտեի նախագահ։ «Որոշումն ընդունվել է կազմակերպության կոնգրեսի նիստում։ Սպասվում է մեծ աշխատանք՝ կշռման մանրուքներից մինչեւ խնդրահարույց պահեր»,- Մամիաշվիլիի խոսքը մեջբերում է tass.ru-ն։ Ռիոյի Օլիմպիական խաղերում ըմբշամարտի մրցաշարը մրցավարական խնդիրներով ամենասկանդալայինն էր։ 2012թ. Լոնդոնի Օլիմպիական խաղերից հետո Միջազգային օլիմպիական կոմիտեն Ըմբշամարտի միջազգային ֆեդերացիայի կոռուպցիոն եւ մրցավարական սկանդալների ֆոնին դրել էր ըմբշամարտը օլիմպիական ծրագրից հանելու խնդիր՝ դրդելով կազմակերպությանը բարեփոխումների։ 2013-ին հեռացվեց միջազգային ֆեդերացիայի նախագահ Ռաֆայել Մարտինետին։ Շվեյցարացին կազմակերպությունը գլխավորում էր 2002 թվականից։ Նրան փոխարինեց սերբ Նենադ Լալովիչը, սակայն ֆեդերացիայի նոր ղեկավար կազմ ձեւավորելուց հետո էլ խնդիրներն ըմբշամարտում չպակասեցին։