Ուզում էր լավը, ստացվեց անեկդոտ
ԱԺ առողջապահության, մայրության եւ մանկության հարցերի մշտական հանձնաժողովն այսօր քննարկում էր ԱԺ պատգամավոր Թեւան Պողոսյանի՝ «Մարդու վերարտադրողական առողջության եւ վերարտադրողական իրավունքների մասին» օրենքում լրացում կատարելու վերաբերյալ օրենսդրական նախագիծը, որը լայն արձագանք է գտել հանրության շրջանակներում: Նիստի մեկնարկին հեղինակը հայտարարեց, որ հանում է նախագիծը: «Ընկալում կար պարտադիրի, բայց զարգացումը հարցի այլ էր, չեմ էլ փոշմանում, որ ներկայացրել եմ, ուղղակի խնդիրը սուր ընկալվեց, բայց հուսամ ապագայում կաշխատենք, ավելի ճիշտ կմշակենք, և թե ինչ կլինի հեռավոր մի քանի տարի հետո՝ ականատես կլինենք»,- իր որոշումն այսպես հիմնավորեց պատգամավոր Թեւան Պողոսյանը: Նախագծով պատգամավորն առաջարկվում էր զորակոչվող զինծառայողների սերմնաբջիջների բանկ պահել` նրանց ժառանգների շարունակականությունն ապահովելու համար: Նախագծում նշված է. «Պետությունը երաշխավորում է 18 տարին լրացած պարտադիր զինվորական ծառայության զինակոչվող քաղաքացիների սեռաբջիջների պահպանությունը՝ այդ նպատակով ստեղծված համապատասխան սեռաբջիջների պահպանության բանկում»: Այսինքն ընդդիմադիր պատգամավորը լրիվ բարի նպատակներով առաջարկում էր զորակոչիկների սերմնաբջիջների բանկ պահել` նրանց ժառանգների շարունակականությունն ապահովելու համար. «Հաշվի առնելով, որ զինվորական ծառայությունը լի է բազում անկանխատեսելի վտանգներով և ռիսկերով, ապա՝ զորակոչիկների հետագա վերարտադրողականությունն ու նրանց սերունդների շարունակականությունն ապահովելու նպատակով, սեռաբջիջների պահպանության բանկի ստեղծումը կունենա կարևոր և էական նշանակություն»: Օրենքի այս հիմնավորումն էլ լրիվ անեկդոտի թեմա դարձավ, օրենքը մեկնաբանվեց այն տեսանկյունից, թե պատգամավորը զինվորին «էս գլխից» առաջարկում է զինվորին. «Կարող է՝ մեռնես, թող սերմնահեղուկդ մնա» եւ ուրեմն ինչ հոգեբանությամբ պետք է այդ զինվորը կռիվ տա, հայրենիք պաշտպանի՝ նախօրոք իմանալով, որ գնում է մեռնելու։ Թեւան Պողոսյանն էլ այսօր նկատեց, որ իրեն այս նախագիծը շրջանառության մեջ դնելու համար ասում են «սեւ թուղթ ստորագրող»: «Միգուցե շատ առաջ ընկանք, բայց տաբեր կարծիքների, քննարկումների հնարավորությունը եղավ: Բացի այդ, բավական լավ բազա է ստեղծվել ինձ մոտ, մարդիկ բավական շատ նյութեր են ուղարկել»,-ասաց նա։ Իրականում Թեւան Պողոսյանը այնպիսի չհիմնավորված ու զգացմունքային մի նախագիծ էր ներկայացրել, որը ծայրից ծայր անեկդոտի թեմա էր։ «Մեկը կարող է թոռ ունենալու ցանկությամբ պահպանի, մյուսը, օրինակ՝ չամուսնացած կին, որը արհեստական բեղմնավորմամբ ուզում է երեխա ունենալ, մտածում է` ո՞ւմն է լինելու, իսկ այս դեպքում կարող է գնալ, կոնկրետ ասել` ա՛յ էն հերոս տղայից եմ ուզում երեխա ունենալ, որ իմ տղեն էլ կամ երեխան էլ նման լավ գենետիկ կոդ ունենա, այդ տղան էլ գենետիկական շարունակություն ունենա: Սա մի տարբերակ, մյուսը` այո, ծնողներինն է, որ, օրինակ՝ ուզեն իրենց մինուճար տղեն սերունդ ունենա: Չգիտեմ` ոնց են օգտագործելու, իմ խնդիրն այն է, որ նման հնարավորություն ունենանք` մեր գենետիկ բազան պահպանվի» մի առիթով պարզաբանել էր Թեւան Պողոսյանը՝ այդպես էլ չհստակեցնելով, թե ինչ երաշխիք, որ ասենք որևէ միայնակ կին որոշի մայր դառնալ, գալու է վերարտադրման կենտրոն ու պահանջելու Թալիշում զոհված տղայի սերմնաբջիջ։ Անի Սահակյան
Հետևեք մեզ Viber-ում
