Խոշոր ավտովթար՝ Արարատի մարզում

Երեկ՝ սեպտեմբերի 5-ին, խոշոր ավտովթար է տեղի ունեցել Արարատի մարզում։ Ժամը 21։30-ի սահմաններում Մասիս քաղաքի բնակիչ, 68-ամյա Օրբել Զաքարյանը Երևան-Երասխ ավտոճանապարհի 11-րդ կմ հատվածում՝ Այնթափ գյուղի վարչական տարածքում, իր վարած Mercedes մակնիշի 21 ՍՍ 400 համարանիշի ավտոմեքենայով դուրս է եկել ճանապարհի երթևեկելի գոտուց, բախվել ճանապարհի երկարությամբ տեղադրված բետոնե արգելապատնեշին և կողաշրջվել։ Ինչպես հայտնում է ֆոտոլրագրող Գագիկ Շամշյանը, վթարի հետևանքով Օ. Զաքարյանը մարմնական վնասվածքներով տեղափոխվել է Մասիսի բժշկական կենտրոն։ Դեպքի վայր են ժամանել Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի աշխատակիցները՝ դասակի հրամանատար Սանասար Հարությունյանի գլխավորությամբ։ Ֆոտոլրագրողը հայտնում է, որ վթարը եղել է ճանապարհը կառուցող «ծալապակաս» շինարարների մեղքով, ովքեր ճանապարհին չեն տեղադրել անվտանգության համար նախատեսված լույսերն ու ժապավենները։ Փաստի առթիվ Հայաստանի քննչական կոմիտեի Արարատի մարզային քննչական վարչության Մասիսի քննչական բաժնում նյութեր են նախապատրաստվում։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: