Սպա-զինվոր հարաբերությունները բավականին լավ հենքի վրա են. Մ. Խաչատրյան

«Քանի դեռ չի լուծվել Ղարաբաղի հարցը, մենք հրադադար չունենք: Շնորհավորում եմ զինվորներին, մաղթում բարի ծառայություն, համբերություն և անպայման հիշեն, որ իրենց սպասող կա: Թող որ 2016-ին զոհեր չլինեն»,-ասաց նա։ «Զինվոր» հասարակական կազմակերպության նախագահ Մարգարիտա Խաչատրյանը բանակի կազմավորման 24-րդ տարեդարձի առթիվ հրավիրված մամուլի ասուլիսի ժամանակ զինծառայողներին մաղթեց խաղաղ և անփորձանք ծառայություն: Տիկին Մարգարիտան նշեց, որ շատ կարևոր է բանակի և հայրենիքի վերաբերյալ դաստիարակությունը սկսել մանկապարտեզից և դպրոցից. «Մեր երեխաները բանակի մասին պետք է տեղեկացված լինեն դեռ մանկուց: Նրանց մեջ հայրենասիրություն պետք սերմանել սկսած մանկապարտեզից և դպրոցից»։ Նկատելով, որ ավարտվում է ձմեռային զորակոչը, ՀԿ նախագահը նշեց, որ իրեն կարող են դիմել զորակոչի հետ կապված խնդիրներով: «Չորս օրից կավարտվի ձմեռային զորակոչը և բոլոր այն ծնողներն ու զինծառայողները, որոնք ունեն խնդիրներ կապված բժշկական հանձնաժողովի աշխատանքների և առհասարակ զորակոչի հետ, կարող են դիմել մեզ»,-ասաց նա։ Բանախոսը նշեց նաև այն ձեռքբերումները, որոնք Հայաստանն ունեցել է բանակի կազմավորման այս 24 տարիների ընթացքում: «Այսօր ունենք անհամեմատ ավելի լավ բանակ և սպայական կազմ: Հրամանատարներն այսօր ավելի գրագետ և բանիմաց են: Սպա-զինվոր հարաբերությունները բավականին լավ հենքի վրա են: Սնունդը նույնպես բավական բարձր մակարդակի վրա է: Զինվորները ցանկանում են սահման պահել, չեն վախենում դիրքերից և կարողանում են արիորեն հետ մղել թշնամու դիվերսիաները»,-ասաց նա։