Աշտարակն «անտեր» մնաց
Աշտարակում սեպտեմբերի 18-ին սպասվող քաղաքապետի ընտրությունները անսպասելի ընթացք են ստանում։ Ինքնաբացարկ է ներկայացրել գործող քաղաքապետ ու քաղաքապետի թեկնածու Արմեն Անտոնյանը։ Նա Հանրապետական չէ, բայց անցած ընտրություններին ՀՀԿ-ն նրա թեկնածությունն է պաշտպանել, այս անգամ Անտոնյանն ինքնաառաջադրվել էր։ Ինքնաբացարկի առիթով հղած ուղերձում թեկնածուն ծավալուն ու լալահառաչ տեքստով ուզում է հիմնավորել իր քայլը, պատմում է, թե ինչ դժվար է եղել անցած չորս տարիներին, երբ ղեկավարել է քաղաքը, թե ինչպիսի ծանր օրեր է ապրել, անհաղթահարելի խնդիրների միջով անցել.«Չգիտես ինչու մշտական պայքարի մեջ ենք եղել բոլորի հետ. վերևների, ներքևների, շրջապատի, կողմնակիցների, հակառակորդների, և մինչև անգամ բարեկամ հարազատների հետ: Այդ պայքարը մշտական էր: Պահեր են եղել, որ կնախընտրեի ճակատային գծում կռվել, իմանալով թե ո՞վ է թշնամիս և ու՞մ դեմ եմ կռվում, քան աշխատել որպես համայնքապետ և կռվել, պայքարել չգիտես թե ու՞մ դեմ կամ ինչի՞ համար:Երևի թե համայնքային շահի համար» իր չկողմնորոշված մտորումներով է կիսվել գործող քաղաքապետը, ապա տեղեկացրել, որ որպես գործող համայնքապետ, շատ է մտածել թեկնածությունն առաջադրելու կամ չառաջադրելու մասին: «Եղավ մի պահ, երբ հաշվի առնելով որոշ օբյեկտիվ և սուբյեկտիվ պատճառներ, որոշեցի չառաջադրվել: Անսալով որոշ աշտարակցիների խնդրանքին և պահանջներին` առաջադրվեցի: «Ես չէի ուզում, ինձ համոզեցին»:Ինքնաառաջադրվեցի, և լինելով անկուսակցական դիմեցի կոալիցիա կազմած ՀՀԿ և ՀՅԴ կուսակցությունների մարզային կառույցներին` իմ թեկնածությունը պաշտպանելու համար: Մոտ երկու շաբաթ սպասեցի, առայժմ ոչ մի արձագանք:Գտնում եմ, որ գործող համայնքապետին չաջակցելը նշանակում է իշխանության կողմից անվստահություն, դրանից բխող բոլոր հետևանքներով» ։ Արմեն Անտոնյանը, հասկանալիորեն, իր երկար-բարակ «լոլոների» տակ թաքցրել է ողջ իրականությունը։ Իսկ իրականությունն այն է, որ ոչ միայն Աշտարակում, այլև ողջ Արագածոտնի մարզում գործի է անցել նախկին մարզպետ, ՀՀԿ-ի կարկառուն ներկայացուցիչ Սարգիս Սահակյանը, ով ամիսներ առաջ ՀՀԿ-ՀՅԴ կոալիցիայի արդյունքում ստիպված եղավ պաշտոնը հանձնել դաշնակցական Գաբրիել Գյոզալյանին։ Բայց այս ամիսների ընթացքում մամուլը չի դադարել գրել, որ Սահակյանը ոչ բացահայտ պայքար է տարել Գյոզալյանի դեմ, համայնքապետերին հրահրել կաթվածահար անել մարզպետի աշխատանքները, չենթարկվել նրան, չայցելել մարզխորհրդի նիստերին։ Սահակյանը հույս ունի, որ այդ ճանապարհով կարող է նորից վերականգնել նախկին դիրքերն ու պաշտոնը, որում եղած ժամանակ բազմաթիվ կոռուպցիոն պատմություններ են նրան վերագրվել։ՏԻՄ ընտրությունների նախաշեմին նույնպես տեղեկություններ ի հայտ եկան, որ Սահակյանը ակտիվ մասնակցություն է ցուցաբերելու, բոլոր համայնքներում իր թեկնածուներին է առաջադրելու ու նրանց հաղթանակի համար միջոցներ չխնայելու։ Աշտարակում առաջադրվել է 7 թեկնածու, ինքնաբացարկ ներկայացրած Անտոնյանից բացի մրցելու հայտ են ներկայացրել ԲՀԿ-ի աջակցությունը վայելող Արշալույս Մեջլումյանը, գործարար Ռազմիկ Տերտերյանը , անկուսակցական Թովմաս Շահվերդյանը, վերջինը գործարար ընտանիքի զավակ, Գեւորգ Եդիգարյանը, որը նույնպես անհատ ձեռներեց եւ Աշոտ Ղլեչյանը՝ Աշտարակի նախկին քաղաքապետ, որի օգտին մամուլի տեղեկություններով ակտիվ լոբբինգ է անում նախկին մարզպետը։ Բոլոր թեկնածուներն ինքնաառաջադրված են բացառությամբ ԲՀԿ թեկնածուի։ Փաստն առաջին հայացքից ազատ, մրցակցային ընտրությունների նախադրյալի տպավորություն է ստեղծվում, բայց միայն առաջին հայացքից, որի ապացույցը նախեւառաջ գործող քաղաքապետի ինքնաբացարկի փաստն է։ Սա նշանակում է, որ ՀՀԿ-ն խրախուսում է Սարգիս Սահակյանին ու թույլ տալիս գործելու լայն հնարավորություն, որպեսզի ըստ էության մարզում չխախտվի բալանսը հօգուտ դաշնակցության։ Չէ որ առջեւում խորհրդարանական ընտրություններ են, գործընկերը գործընկեր, բայց կարեւորը ՀՀԿ-ի վերարտադրության գերխնդիրն է։ Հ.Գ.-Արմեն Անտոնյանից մինչեւ առաջադրումը «Ժողովուրդ»-ը հետաքրքրվել է առաջադրվե-չառաջադրվելու մտադրության մասին, նա էլ վստահաբար ասել է. «Առաջադրվելու եմ: Մի՛ անհանգստացեք, ես Աշտարակը անտեր չեմ թողնի» ։ Անի Սահակյան
Հետևեք մեզ Viber-ում
