Գերմանացի պատգամավորները հոկտեմբերին կարող են այցելել Թուրքիայի «Ինջիրլիք» բազա

Գերմանիայի Բունդեսթագի պատգամավորները Թուրքիայի «Ինջիրլիք» բազա կկարողանան այցելել հոկտեմբերի 4-ին՝ հայտնում է Spiegel պարբերականը: Այսպես կոչված, «հայկական բանաձևը», որով Գերմանիայի խորհրդարանը 1915 թվականին հայերի դեմ կատարված հանցագործությունները ճանաչել է որպես Ցեղասպանություն, առաջացրել է Անկարայի բուռն արձագանքը և պատճառ դարձել 2 երկրների միջև լարվածության առաջացման: Մասնավորապես՝ Թուրքիան գերմանացի պատգամավորներին արգելել է այցելել բունդեսվերի զինվորներին «Ինջիրլիք» ռազմաբազայում: Սակայն, ինչպես գրում է Spiegel-ը, Թուրքիան Գերմանիայի հետ մերձեցման հետաքրքրություն է ցուցաբերում: «Մենք տեսնում ենք ազդանշաններ առ այն, որ ուղևորությունը տեղի կունենա: Ես հույս ունեմ, որ հաջորդ շաբաթ կստացվի թուրքական կառավարության թույլտվությունը»,- պարբերականին ասել է անվտանգության քաղաքականության հարցերով Գերմանիայի Սոցիալ-դեմոկրատական կուսակցության խմբակցության նախագահ Ռայներ Առնոլդը: