Մոսկվան կրկին կփորձի՞ Բաքվի «խաթրով գնալ»
Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան երեկ հայտնել է, որ սեպտեմբերի 8-ին ԵԱՀԿ Մինսկի խմբի համանախագահները կժամանեն Մոսկվա: «Մոսկվայում նախատեսված է Մինսկի խմբի համանախագահների խորհրդակցություն անցկացնել` Ռուսաստանը ներկայացնող Իգոր Պոպովի մասնակցությամբ: Այդ ընթացքում համանախագահները կհանդիպեն Ռուսաստանի ԱԳՆ ղեկավարության հետ: Քննարկվելու են Լեռնային Ղարաբաղի խնդրի կարգավորմանը վերաբերող հրատապ հարցեր: Հատուկ ուշադրություն է հատկացվելու այն պայմանավորվածությունների կատարման ընթացքին, որոնք ձեռք են բերվել մայիսի 16-ին Վիենայում և հունիսի 20-ին Սանկտ Պետերբուրգում կայացած գագաթաժողովների ընթացքում», նշել է Զախարովան: Օրեր առաջ Զախարովան ուշագրավ հայտարարություն էր արել` ղարաբաղյան կարգավորման գործընթացում ԱՄՆ-ի դերակատարության վերաբերյալ նկատելով, թե ԱՄՆ-ն չի զիջի առաջնորդությունը Ղարաբաղի հարցում՝ Սիրիայում դիրքերի զիջման փոխարեն. «Չեմ հավատում, որ ԱՄՆ-ն ինչ-որ հարցում կհամաձայնվի զիջել առաջնորդությունը Ռուսաստանին: Բայց եթե այդպես լինի, ապա դա իսկական առաջխաղացում կլինի»,- մասնավորապես՝ ասել է Զախարովան: Հիմա, փաստորեն, համանախագահները Մոսկվան են պատրաստվում մեկնել: Ընդ որում, դեռ հուլիսին խոսակցություններ կային այն մասին, որ համանախագահները պետք է մեկնեն Անկարա: Սակայն ռազմական հեղաշրջման փորձից հետո այդ այցը հետաձգվեց: Այժմ Պուտինը, թերևս, կրկին է փորձում Սարգսյան-Ալիև նոր հանդիպում կազմակերպել, դրա համար որոշ դետալներ է, հավանաբար, պատրաստվում քննարկել համանախագահների հետ: Երեկ Հայաստանի արտգործնախարար Էդվարդ Նալբանդյանն հեռախոսազրույց է ունեցել Ռուսաստանի իր գործընկեր Սերգեյ Լավրովի հետ, որի ընթացքում քննարկվել են հայ-ռուսաստանյան օրակարգի մի շարք հարցեր։ Հայաստանի և Ռուսաստանի արտաքին քաղաքական գերատեսչությունների ղեկավարներն անդրադարձել են Վիեննայի և Սանկտ Պետերբուրգի գագաթաժողովներին ձեռք բերված պայմանավորվածությունների իրականացմանը, ինչը համապատասխան պայմաններ կստեղծի ղարաբաղյան հիմնախնդրի խաղաղ կարգավորման գործընթացն առաջ մղելու համար։ Էդվարդ Նալբանդյանը երեկ հանդիպել է Ֆրանսիայի Եվրոպական հարցերով պետքարտուղար Հարլեմ Դեզիրին, որի ընթացքում զրուցակիցներն անդրադարձել են Լեռնային Ղարաբաղի հիմնախնդրի կարգավորման գործընթացին` ընդգծելով Վիեննայի և Սանկտ Պետերբուրգի գագաթաժողովներին ձեռք բերված պայմանավորվածությունների կատարման կարևորությունը: Հիշեցնենք, որ Ադրբեջանի արտգործնախարար Էլմար Մամեդյարովը օրերս Թբիլիսիում հայտարարել էր, թե «Պետերբուրգում Ռուսաստանի նախագահի միջնորդությամբ կայացած հանդիպումից հետո ղարաբաղյան կարգավորման բանակցությունները կարծես ճիշտ ուղու վրա են»: Բաքուն, փաստորեն ազդարարում է, որ հավատում է բացարձակապես ռուսական պլանին: Իսկ սա իր հերթին նշանակում է, որ նոր փուլ կարող է սկսվել` Ռուսաստանի կողմից Հայաստանի նկատմամբ ճնշումների գործադրման առումով: Ընդ որում, բացի Սանկտ Պետերբուրգի հանդիպումը՝ ավելի վաղ, եղել է Վիեննայի հանդիպում, բայց Էլմար Մամեդյարովը դա չի էլ հիշատակում: Պարզ է, թե ինչու: Հենց այդ հանդիպմանն է Ալիևի նկատմամբ ճնշումներ կիրառվել` պահանջելով սահմանային միջադեպերի ուսումնասիրության մեխանիզմներ կիրառել, ինչը բոլորովին Ադրբեջանի իշխանությունների սրտով չէ: Այսպիսով, Մոսկվան կրկին մի փորձ է անում Բաքվի ակնկալիքներին համահունչ բանակցություններ առաջ տանել: Թամար Բագրատունի
Հետևեք մեզ Viber-ում
