Թուրքական հե՞տք գազամուղի պայթեցման փորձում. «կենացները քաղցրանում են»
Նախօրեին ուշագրավ տեղեկություն հայտնեցին վրաստանյան լրատվամիջոցները: Բեկա Բեկաուրին, ով Վրաստանի տարածքում Ռուսաստան-Հայաստան գազատարի պայթեցման փորձի գործով մեղադրյալներից մեկն է, սպասում էր 50.000 դոլար գումարի, որը ենթադրաբար պետք է ստացվեր Թուրքիայից: Այս մասին հայտնել է «Կվիրիս պալիտրա» թերթը՝ վկայակոչելով Վրաստանի պետական անվտանգության ծառայության տեղեկատուի ցուցմունքները: Վրաստանի պետական անվտանգության ծառայությունը օգոստոսի 22-ին հայտարարել էր ահաբեկչական ակտի նախապատրաստման բացահայտման և 7 մարդու կալանավորման մասին, այդ թվում նաև` պարեկային ոստիկանության աշխատակցի: Նրանք պատրաստվում էին Արագվի գյուղի մոտ պայթեցնել գազատարը, որով բնական գազը Ռուսաստանից հասնում է Հայաստան: Նրանք բոլորն էլ այժմ նախնական կալանքի տակ են: Երբ հարցաքննության ժամանակ Բեկաուրին հարցրել են, թե ում տված առաջադրանքն է կատարել և ով է ֆինանսավորողը, նա խուսափողական պատասխան է տվել, սակայն հստակեցրել է, որ արտերկրից սպասել է 50.000 դոլար, իսկ ավելի ուշ մանրամասնել է, որ այդ գումարը սպասել է Թուրքիայից: Բեկաուրին ամեն դեպքում չի կոնկրետացրել, թե ով է պատվիրատուն: Այս խոստովանությունը խիստ ուշագրավ է: Այն կարող է իհարկե, չհամապատասխանել իրականությանը և մեղադրյալի կողմից դիտավորյալ իրական պատվիրատուին չբացահայտելու միտում ունենալ: Սակայն, եթե այն համապատասխանում է իրականությանը, ապա այստեղ լուրջ խնդիրներ կարող են առաջ գալ` Վրաստան-Թուրքիա, Ռուսաստան-Թուրքիա փոխհարաբերություններում: Նախ` Վրաստան-Թուրքիա հարաբերությունների առումով, սա լուրջ պետական նշանակության խնդիր է: Նշանակում է, եթե Թուրքիան իրոք ներգրաված է այս հանցագործությունում, ապա Վրաստանի անվտանգությանը հարված հասցնելու իրական շարժառիթները դեռ պետք է բացահայտվեն: Թուրքական հետքի նպատակը Վրաստանի՞ն, թե՞ Ռուսաստանի ու Հայաստանին վնաս հասցնելն է եղել: Բոլոր դեպքերում էլ առաջին վնասը` Վրաստանին է ուղղված, վրացական պետության վարկանիշին, որը պարտավոր է ապահովել գազամուղի անխափան գործունեությունը: Եթե թիրախը Հայաստանն է, ապա Ռուսաստանի գազամուղի նկատմամբ նման հանցագործությունը կարող է բարկացնել նաև Ռուսաստանին: Պուտին-Էրդողան վերջին հանդիպումը, որքան էլ հարաբերությունների կարգավորման լուրջ հիմք գնահատվեց, այնուամենայնիվ Ռուսաստանի և Թուրքիայի միջև տարաձայնություններն առայժմ այնքան էլ քիչ չեն: Երեկ թուրքական «Sözcü» պարբերականի սյունակագիր Ջան Աթաքլըը հրապարակած իր հոդվածում անդրադարձել է Ռուսաստանի Սանկտ Պետերբուրգ քաղաքում վերջերս տեղի ունեցած Պուտին-Էրդողան հանդիպմանը՝ ներկայացնելով ուշագրավ մանրամասներ: ermenihaber.am-ը հայտնում է, որ «Sözcü» թերթի էլեկտրոնային էջում տեղ գտած հոդվածում սյունակագիրը պնդում է, որ Ռուսաստանի նախագահը Թուրքիայի նախագահին առաջադրել է այն 7 կարևոր նախապայմանները, որոնց լուծման դեպքում երկկողմ հարաբերությունները վերջնականապես կկարգավորվեն: Ըստ Աթաքլըի-ի` Պուտինը, դիմելով Էրդողանին, ասել է. 1.«Սիրիայի նկատմամբ ձեր վարած քաղաքականությունը ի սկզբանե սխալ է ընթացել: Մենք Ասադին պաշտպանում ենք ,դուք էլ արդեն համառությունից հրաժարվեք և ճանաչեք Ասադի գոյությունը»: 2. «Ղարաբաղը մեզ համար շատ կարևոր է: Գիտենք նաև, որ ձեզ համար էլ Ադրբեջանի պատճառով է կարևոր, սակայն այս հարցում զսպվածություն ցուցաբերեք: Այս խնդիրը լուծման կարիք ունի: Մեզ հակառակվելով՝ խնդիրը լուծելու փոխարեն, ավելի եք բարդացնում»: 3. «Ղրիմի հարցում դուք պաշտպանում եք մեր դեմ իրականացվող քայլերը: Եվ դա անում եք, Կովկասի որոշ երկրներում նույնպես: Սխալ եք անում: Դա խոչընդոտում է հարաբերությունների կարգավորմանը»: Եթե այս խնդիրներին գումարվի նաև Վրաստանի տարածքում Ռուսաստանից Հայաստան եկող գազամուղի պայթեցման փորձի մեջ թուրքական հետքը, ապա այստեղ «կենացներն» իսկապես կարող են քաղցրանալ: Մետաքսյա Շալունց