Մնում է միայն գովաբանել Պուտինի միջնորդությունը
«Պետերբուրգում Ռուսաստանի նախագահի միջնորդությամբ կայացած հանդիպումից հետո ղարաբաղյան կարգավորման բանակցությունները, կարծես, ճիշտ ուղու վրա են», - Թբիլիսիում Վրաստանի արտաքին գործերի նախարար Միխաիլ Ջանելիձեի հետ բանակցությունների ավարտին կայացած մամուլի ասուլիսի ժամանակ հայտարարել է Ադրբեջանի դիվանագիտական գերատեսչության ղեկավար Էլմար Մամեդյարովը` պետերբուրգյան հանդիպումը բնութագրելով որպես բանակցային պրոցեսի «կարևոր դրվագ»: «Տրամադրվածություն և համոզմունք կա, որ մենք ճիշտ ուղղությամբ ենք շարժվում, ինչն իր հերթին կարող է բանակցային պրոցեսում բեկման հանգեցնել: Մենք կարծում ենք, որ նման հնարավորությունն առկա է: Խնդիրը շատ հստակ է․ մենք դա անվանում ենք փոխշահավետ իրավիճակ, երբ ստեղծված կացությունից շահած կարող են դուրս գալ ոչ միայն այն մարդիկ, ովքեր ենթարկվել են էթնիկ զտման և ներքին տեղահանվածներ են դարձել, այլև պետություններն ու կառավարությունները: Այս ամենը կարող է փոխշահավետ համագործակցության հսկայական հնարավորություններ ստեղծել», - նշել է Մամեդյարովը: «Քաղաքական կամք․ ահա այն հիմնական գործոնը, որն անհրաժեշտ է ղարաբաղյան կարգավորման բանակցային պրոցեսում բեկում ապահովելու համար», - համոզմունք է հայտնել Ադրբեջանի արտաքին գործերի նախարարը՝ պնդելով․ - «Համապատասխան քաղաքական կամքի դրսևորման և միջազգային իրավունքի նորմերի, արդեն իսկ ընդունված բանաձևերի ու փաստաթղթերի, այդ թվում, ՄԱԿ-ի Անվտանգության խորհրդի բանաձևերի հանդեպ հարգանք ցուցաբերելու դեպքում, մենք ի վիճակի կլինենք ընդհանուր հայտարարի գալ, ինչի շնորհիվ տարածաշրջանում խաղաղություն, կայունություն և բարգավաճում կհաստատվի: Դա նախևառաջ շահավետ է լինելու Հայաստանի և Ադրբեջանի ժողովուրդների համար»: Ադրբեջանի արտաքին գործերի նախարարն իր թբիլիսյան այցի ընթացքում չի շրջանցել նաև Վրաստանի հետ համատեղ իրականացվող էներգետիկ և տրանսպորտային նախագծերի, նախևառաջ Բաքու - Թբիլիսի - Կարս երկաթուղու շինարարության թեման: Մամեդյարովի համոզմամբ, Հայաստանը շրջանցող այս երկաթուղու շինարարությունն ավարտին կհասցվի արդեն առաջիկա ամիսներին․ - «Վրաստան կատարած իմ վերջին այցի ընթացքում, իմ լավ բարեկամ Միխաիլ Ջանելիձեի և Թուրքիայի արտաքին գործերի նախարար Չավուշօղլուի հետ մեկտեղ, ինձ ևս գնացքով մինչև թուրք-վրացական սահման հասնելու բացառիկ հնարավորություն ընձեռվեց: Կարծում եմ, որ ինչպես և խոստացվել է, այս տարի արդեն շահագործման կհանձնվի երկաթուղու վերջին՝ թուրքական հատվածը»: Այսօր, երբ չի երևում ղարաբաղյան բանակցային գործընթացն ինչպես պետք է շարունակվի`Ադրբեջանը կրկին խոսում է այն մասին, թե` «ճիշտ ուղղությամբ ենք շարժվում» և բանակցային պրոցեսում «բեկման հանգելու» հնարավորության մասին: Բաքուն մատնանշում է, թե ինչպես պետք է հասնել «բեկման», դրա համար, ըստ Ադրբեջանի` «Քաղաքական կամք» է անհրաժեշտ: Ղարաբաղյան կարգավորման բանակցային պրոցեսում բեկում ապահովելու համար, ինչպես միշտ, Բաքուն հղում է կատարում իր համար ցանկալի փաստաթղթերին` ՄԱԿ-ի բանաձևերին, ընդ որում, առանց դրանք անաչառորեն ներկայացնելու, և միջազգային իրավունքի նորմերը` յուրովի պատկերացնելով ու ներկայացնելով: Բայց ամենակարևոր խոստովանությունն այն է, որ Բաքուն շեշտում է, որ հենց Պետերբուրգում Ռուսաստանի նախագահի միջնորդությամբ կայացած հանդիպումից հետո են ղարաբաղյան կարգավորման բանակցությունները ճիշտ ուղու վրա հայտնվել: Էլ ինչպե՞ս Բաքուն հասկացնի, որ բացառապես Պուտինի միջնորդությամբ բանակցություններին է կողմ, ոչ թե ԵԱՀԿ Մինսկի խմբի եռանախագահների ձևաչափին: Չէ՞ որ այդ ձևաչափում նեղում են Ալիևին, պահանջներ են ներկայացնում` սահմանային միջադեպերի ուսումնասիրության և այլն: Իսկ Պուտինը` համաձայն է, թերևս, Բաքվի բոլոր պահանջների հետ: Պարզապես, ուշանում է դրանց կյանքի կոչելը: Իսկ Ալիևին այլ բան չի մնում, քան շարունակաբար գովաբանել Պուտինի միջնորդությունը: Մետաքսյա Շալունց