Վիրահատվել է Աշոտ Պետրոսյանն.մանրամասներ

«Սասնա ծռերի» կալանավորված անդամ Աշոտ Պետրոսյանի (նկարիչ Աշոտ) վիրահատությունն ավարտվել է. ինչ նախատեսված էր, բավականին որակով կատարվել է, տեղադրվել է տիտանային հարթակ, կոտրվածքը ֆիքսվել է: Այս մասին, այսօր՝ օգոստոսի 30-ին, լրագրողների հետ զրույցում նշել է «Էրեբունի» ԲԿ տնօրեն Միքայել Մանուկյանը: Նրա խոսքով, 1-2 օր նա կմնա վերակենդանացման բաժանմունքում. «Կարծում եմ, 1-2 օրվա ընթացքում  արդեն հիվանդին հնարավոր կլինի տեղափոխել հետագա բուժման «Դատապարտյալների հիվանդանոց»: Միքայել Մանուկյանը նշել է, որ թե Արամ Մանուկյանի, թե Աշոտ Պետրոսյանի վիրահատությունները վերջնական ֆիքսացիաներ են, որոնք կատարվում են հատուկ մետաղական հարթակների միջոցով, որով ֆիքսվում է կոտրվածքը: «Վիրահատության միտքն այն է, որ հիվանդները շուտ ոտքի կանգնեն, շուտ սկսեն քայլել եւ դա մենք արագ այդ գործընթացը կկատարենք»,-ասաց նա: Հարցին, թե կարո՞ղ եք վստահեցնել, որ Արամ Մանուկյանի եւ Աշոտ Պետրոսյանի վիրահատություններից հետո նորմալ բուժսպասարկում կլինի «Դատապարտյալների հիվանդանոցում»՝ հաշվի առնելով, որ Հարություն Հովհաննիսյանի պաշտպանները հայտարարում են, որ իրենց պաշտպանյալին պատշաճ բուժօգնություն չի ցուցաբերվում, «Էրեբունի» ԲԿ տնօրենը պատասխանեց. «Ես չեմ կարող համապատասխան տեղեկություն տալ, որովհետեւ ես այդ հիվանդանոցի ղեկավարը չեմ, բայց մենք մշտական կապի մեջ ենք գտնվում այդ հիվանդանոցի բժիշկների հետ, եւ այն հիվանդներին, որոնց մենք վիրահատել ենք, գտնվում են բավարար վիճակում: Փաստ է նաեւ այն, որ նրանց բավարար վիճակը մեզ թույլ տվեց այսօր կատարել երկու բարդ վիրահատություն: Եթե «Դատապարտյալների հիվանդանոցի» վիճակը բավարար չլիներ, այս երկու վիրահատությունները՝ Արամ Մանուկյանի եւ Աշոտը Պետրոսյանի, հնարավոր չէր լինի: Այստեղից եզրակացություն պետք է անել, որ բուժօգնությունն այնտեղ պատշաճ է»: