Ադրբեջանի հարցը՝ Եվրախորհրդարանում

Եվրախորհրդարանում օգոստոսի 31-ին լսումներ կանցկացվեն աշխարհի երրորդ երկրներում, այդ թվում` Ադրբեջանում մարդու իրավունքների եւ կոռուպցիայի իրավիճակի թեմայով: Լսումներին կմասնակցի «Սպորտը հանուն մարդու իրավունքի» (Sport for Human Rights) արշավի համակարգող Ռեբեկա Վինսենթը: Այս մասին twitter-ի իր էջում գրառել է ինքը` Ռեբեկա Վինսենթը: Լսումներին կմասնակցեն Եվրամիության եւ Եվրահանձնաժողովի արտաքին քաղաքական գործողությունների ծառայությունները: Վինսենթը գտնում է, որ ԵՄ-ը պետք է Բաքվից ավելի խստորեն պահանջի կատարել մարդու իրավունքների ոլորտում իր պարտավորությունները: «Սպորտը հանուն մարդու իրավունքների» արշավի ակտիվիստները գտնում են, որ չնայած մարտ-մայիս ամիսներին մի շարք քաղաքական եւ քաղաքացիական ակտիվիստների ազատմանը, Ադրբեջանում իրավիճակը գործնականում չի փոխվել, վերջին մի քանի շաբաթներին նոր ձերբակալությունն եր են տեղի ունեցել: Նրանք նշել են, որ դա տեղի է ունեցել Ադրբեջանի նախագահի կողմից սեփական լիազորություններն էլ ավելի ընդլայնող սահմանադրական փոփոխությունների գծով հանրաքվե նախաձեռնելուց հետո, որը պետք է անցկացվի սեպտեմբերի 26-ին: