Պուտինն ի՞նչ էր Ղարաբաղի հարցով Օբամայից ուզել, որ չի ստացել
Երեկ խիստ ուշագրավ, թափանցիկ ակնարկով է հանդես եկել Ռուսաստանի արտգործնախարարության պաշտոնական ներկայացուցիչ Մարիա Զախարովան` Լեռնային Ղարաբաղի հակամարտության կարգավորման գործընթացում համանախագահների դերակատարության վերաբերյալ: Մարիա Զախարովան, ոչ ավել, ոչ պակաս, կարծիք է հայտնել է, որ չի հավատում, թե Ղարաբաղյան հարցում Միացյալ Նահանգները կզիջի առաջնորդությունը Ռուսաստանին: Ըստ ադրբեջանական APA գործակալության նման հայտարարություն Զախարովան արել է Մոսկվայում ասուլիսի ժամանակ: Մասնավորապես՝ լրագրողներից մեկի հարցրել է նրան, թե ճի՞շտ է արդյոք, որ Մոսկվա կատարած վերջին այցի ժամանակ ԱՄՆ պետքարտուղար Ջոն Քերին Կրեմլին առաջարկել է առաջնորդի դեր ստանձնել Ղարաբաղյան հակամարտության կարգավորման գործում՝ Սիրիայում դիրքերի զիջման փոխարեն, Զախարովան արձագանքել է, որ եթե ԱՄՆ-ն զիջի առաջնորդությունը, ապա դա իսկական առաջխաղացում կլիներ: «Չեմ հավատում, որ ԱՄՆ-ն ինչ-որ հարցում կհամաձայնվի զիջել առաջնորդությունը Ռուսաստանին: Բայց եթե այդպես լինի, ապա դա իսկական առաջխաղացում կլինի»,- մասնավորապես՝ ասել է Մարիա Զախարովան: Սա, առավել քան ուշագրավ հայտարարություն է այն առումով, որ պաշտոնական Մոսկվան, փաստացի, արձանագրել է, որ ղարաբաղյան կարգավորմամբ զբաղվող ԵԱՀԿ Մինսկի խմբի երկու համանախագահող երկրները` Միացյալ Նահանգներն ու Ռուսաստանի այս խնդրում առաջնորդության պայքար են տանում: Ավելին` Մոսկվան նույնիսկ ֆիքսել է, իսկ ավելի ճիշտ կլինի ասել, դժգոհել է, որ Վաշինգտոնը չի զիջում իր առաջնորդությունը Ղարաբաղի հարցում Մոսկվային: Սա առավել քան ուշագրավ փուլում, բավական հետաքրքրական խոստովանություն է, որովհետև մենք սովոր էինք լսել, որ ԵԱՀԿ Մինսկի խմբի համանախագահները միասնական են, միահամուռ ուժերով փորձում են կողմերին համաձայնության տանել: Իհարկե, բոլորն էին հասկանում, որ չեն կարող այս տարածաշրջանում և, մասնավորապես ղարաբաղյան կարգավորման գործընթացում ԵԱՀԿ Մինսկի խմբի համանախագահներ Միացյալ Նահանգների ու Ռուսաստանի շահերը, պատկերացումներն ու նպատակները նույնը լինել: Փաստացի, Ռուսաստանի արտգործնախարարության պաշտոնական ներկայացուցիչ Մարիա Զախարովան արձանագրել է մի բան` Միացյալ Նահանգները թույլ չի տալիս, որ Ռուսաստանը առաջնորդությունը վերցնի ղարաբաղյան կարգավորման գործընթացում: Վստահաբար, Վաշինգտոնը ճիշտ է վարվում`թույլ չտալով Ռուսաստանին «ղեկն» իր ձեռքում պահել: Հաշվի առնելով Ռուսաստան-Ադրբեջան, այժմ էլ` Ռուսաստան-Թուրքիա հարաբերությունների ջերմացումը` Ռուսաստանի առաջնորդությունը ղարաբաղյան կարգավորման հարցում կարող է կործանարար լինել թե՛ Լեռնային Ղարաբաղի, թե՛ Հայաստանի համար: Թամար Բագրատունի