Դաշնակցության պարագլուխներն ազգի ամենավտանգավոր թշնամին են.նախկին ՀՅԴ-ական
Դաշնակցության կոալիցիա մտնելու հարցը շարունակում է մնալ Հայաստանի քաղաքական թոփ հարցերի շրջանակում: Մինչ պորտֆելների շուրջ ընթանում է ՀՀԿ-ՀՅԴ սակարկումները, տեղեկություններ կան, որ Դաշնակցության հատկապես սփյուռքյան շարքերում բողոք է հասունանում: ՀՅԴ Բյուրոյի քաղաքական ներկայացուցիչ Հրանտ Մարգարյանի հայտարարությունը կոալիցիա մտնելու մասին, պարզվում է, համաձայնեցված չի եղել սփյուռքի կուսակցական կառույցների հետ: Միայն ՀՅԴ Բյուրոյի մի քանի անդամներ են, որ փորձում են պաշտպանել կուսակցության ղեկավարի դիրքորոշումը: Նրանց քարոզչության հիմնական թեման այն է, որ Հայաստանն այսօր գտնվում է ճգնաժամում եւ Դաշնակցությունը ` որպես երկրի ճակատագրով մտահոգ ուժ, իրավունք չունի կողքի կանգնել և դիտորդի դերում գտնվել, որ իրենք պետք է ակտիվորեն մասնակցեն Հայաստանը այս ծանր վիճակից դուրս բերելու գործին: Նախկին ՀՅԴ-ական, ազատամարտիկ Սարգիս Կարապետյանը մեզ հետ զրույցում ասաց, որ միշտ է եղել այդպես, Դաշնակցությունում որոշումներ կայացրել են «պարագլուխները», իսկ շարքերը միշտ էլ դժգոհ են եղել նրանց որոշումներից: Կարապետյանին Դաշնակցությունից հեռացրել են 2013-ին, երբ վերջինը իշխանության դեմ հայտարարություններ է արել: «Այս երկրում ինչ կատարվել է, «առյուծի բաժինը» դաշնակների մեղքն է: Էդ որ ասում են՝ ծառայել ենք, ծառայել ենք, ազգին ենք ծառայել, բա ո՞ւր է իրենց ծառայությունը, մոռացա՞ն» ասաց Սարգիս Կարապետյանը՝ շեշտելով, որ շարքային դաշնակցականները հիմա էլ շարունակում են մնալ իր ընկերները: Նախկին դաշնակցականի խոսքով՝ ոչ մի շարքային դաշնակցականի համար էլ ընդունելի ու հաճելի չէ իշխանության հետ կոալիցիայի հեռանկարը.«Մի ժամանակ, երբ Դաշնակցությունն իր դիրքերում, դա պատերազմի տարիներն էին, ես՝ թալինցի Սաքոն Դաշնակցության արծիվն էր, բայց հետագայում, երբ ինձ ծանոթացրեցին այդ կուսակցության պատմությանը, ես կույր էի,երկրի փրկությունը տեսնում էի միայն այդ կուսակցության մեջ, բայց հետագայում հասկացա, որ դա 100 տոկոս սուտ է, սրիկա են, էս ազգի ամենավտանգավոր, ամենանենգ թշնամին իրենք են, իրենց պարագլուխները: Շարքերն ուղղակի էշ են, բոլորն իմ ընկերներն են, բայց բոլորին համոզում են», ասաց նա.«Դաշնակցությունը 1907թ-ին Երիտասարդ թուրքերի հետ պայման կապեց, հիմա հարյուր տարի անց Դաշնակցությունը կրկին նմանների հետ է պայման կապում, դաշնակցությունից դրանից ավել սպասել հնարավոր չէ»: Մեր դիտարկմանը, որ հիմա էլ են ասում կոալիցիա ենք կազմում, որ ծառայենք եւ երկիրը դուրս բերենք ճգնաժամից, Կարապետյանն արձագանքեց.«Էս երկրում ոչ մեկը չի կարող մեղմել հաստատված խորը ճգնաժամը: Ազգի փրկությունը մեկն է, մինչեւ գայլերի ոհմակը չոչնչացնես, գառներին չես կարող ապահով դարձնել»,- ասաց նա: Կարապետյանի խոսքով Հայաստանում այսօր ոչ ընդդիմություն կա, ոչ ընդդիմադիրներ.«Ընդդիմությունը ցեղասպանություն կատարողների լրտեսներն են հայ ժողովրդի շարքերում»: Անի Սահակյան