Հաշիվներ` նաև Ալիևի հետ. նրան էլ Կասպից ծովը կնետեն

Ամերիկյան հատուկ պատվիրակությունը, ինչպես հայտնի է, ժամանել է Թուրքիա՝ այդ երկրի իշխանությունների հետ քննարկելու ամերիկաբնակ կրոնական գործիչ Ֆեթուլլահ Գյուլենի արտահանձնման հարցը: Պատվիրակության կազմում են փաստաբաններ և ԱՄՆ արդարադատության նախարարության երեք աշխատակից, ինչպես նաև Պետքարտուղարության մեկ ներկայացուցիչ: Ակնկալվում է, որ բանակցությունները կշարունակվեն երկու օր, դրանց ընթացքում տեղի կունենա մտքերի փոխանակում Գյուլենին Թուրքիային արտահանձնելու պահանջի շուրջ: Թուրքական լրատվամիջոցների փոխանցմամբ՝ ամերիկյան կողմը կտեղեկանա այն փաստերի մասին, որոնք ապացուցում են Գյուլենի մասնակցությունը հուլիսի 15-ին Թուրքիայում տեղի ունեցած հեղաշրջման փորձին: Մինչ այդ, պաշտոնական Անկարան Վիեննայից հետ է կանչել իր դեսպանին: Բանն այն է, որ Թուրքիայի և Ավստրիայի դիվանագիտական հարաբերությունները լարվել են: Թուրքիայի արտաքին գործերի նախարար Մևլութ Չավուշօղլուն հայտարարել է, որ պաշտոնական Անկարան վերանայում է երկկողմ հարաբերությունները Վիեննայի հետ և մեղադրել է Ավստրիային Թուրքիայում, Եվրամիությունում և Միացյալ Նահանգներում ահաբեկչական կազմակերպություն համարվող Քրդական բանվորական կուսակցությանն (PKK) աջակցելու մեջ՝ այդ երկրում ի պաշտպանություն ՔԲԿ-ի անցկացված ցույցի պատճառով: Ի դեպ, Ավստրիան նաև խստորեն քննադատել է ԱՄՆ-ում բնակվող կրոնական գործիչ, Թուրքիայում ձախողված ռազմական հեղաշրջման փորձի համար մեղադրվող Ֆեթուլլահ Գյուլենի կողմնակիցների նկատմամբ հետապնդումները Թուրքիայի նախագահ Ռեջեփ Էրդողանի կողմից: Ավստրիայի կանցլեր Քրիստիան Քերնը մեղադրել է Էրդողանին ժողովրդավարական չափանիշների խախտման մեջ և առաջարկել է Եվրոպական միությանը դադարեցնել Թուրքիայի հետ բանակցությունները ԵՄ-ին անդամակցության հարցով: Գյուլենին արտահանձնելու ուղղությամբ պաշտոնական Անկարան, փաստացի, հետևողական աշխատանք է տանում: Հազիվ թե Միացյալ Նահանգները Գյուլենին հանձնելու որոշում ընդունի, ինչը իր հերթին` ԱՄՆ- Թուրքիա հարաբերություններում լրացուցիչ լարվածության հիմք կհանդիսանա: Իրականում, Գյուլենը դարձել է մի իսկական քաղաքական սարսափ ոչ միայն Թուրքիայի, այլև Ադրբեջանի համար... Գյուլենի «Հիզմեթ» («Ծառայություն») կրոնական կազմակերպության մի շարք անդամներ սկսել են հետապնդվել նաև Ադրբեջանում: Ըստ «Սաբահ» թերթի՝ Ադրբեջանի կառավարությունը քայլեր է ձեռնարկում երկրում Գյուլենի հիմնած կրոնական դպրոցները փակելու ուղղությամբ: Այս առիթով «Սաբահ» թերթին հարցազրույց է տվել Վրաստանում գյուլենական համայնքի դպրոցների նախկին ղեկավար և պատասխանատու Հայաթի Քյուչյուքը, հայտնում է Tert.am-ը: Քյուչյուքը, մասնավորապես, նշել է, որ Ադրբեջանում գտնվող իրենց ներկայացուցիչն անձամբ է զանգահարել Գյուլենին ԱՄՆ և բողոքել, որ Ալիևի ռեժիմն ամեն կերպ փորձում է խոչընդոտել նրանց աշխատանքը: Դրան ի պատասխան Գյուլենը բացականչել է. «Թող այնպես չանեն, որ ես իրենց նետեմ Կասպից ծովը»: Քյուչյուքը նաև պատմել է, որ գյուլենականները բոլոր երկրներում գործում են գաղտնի, և Ադրբեջանում նրանք քիչ չեն: Ըստ նրա՝ թեև Ռուսաստանում նրանց դպրոցներից որոշները փակվել են, սակայն իրենք շարունակում են գործել նաև ՌԴ սահմաններում և մեծ թվով համախոհներ ունեն Հյուսիսային Կովկասի մահմեդականների շրջանում: Հայաթի Քյուչյուքն իր սկանդալային հարցազրույցում բացահայտել է, որ ԱՄՆ Փենսիլվանիա նահանգում գյուլենականները պարբերաբար ժողովներ են գումարում, որոնց ընթացքում քննարկվում է հեղաշրջում իրականացնել նաև Ադրբեջանում: Ստացվում է, որ Անկարայի և Բաքվի համար Գյուլենի հանձնումը դարձել է կենաց-մահու խնդիր: Էրդողանը սպառնում է, թե, երբ խոսքը գնում է կասկածյալ ահաբեկիչների մասին, Թուրքիան առանց փաստաթղթեր պահանջելու արտահանձնում է նրանց ԱՄՆ-ին` ակնկալելով, որ Վաշինգտոնը նույնը կանի Գյուլենի դեպքում, սակայն ակնհայտորեն ԱՄՆ-ը նման կերպ վարվելու մտադրություն չունի: Միացյալ Նահանգները ինչ-որ ելք պետք է գտնի` Գյուլենին չհանձնելու հարցում, որովհետև դա անելը կնշանակի գիտակցված Գյուլենին ուղարկել մահվան: Մետաքսյա Շալունց