Արթուր Գևորգյանը «ապահովագրել» է իր ընտանիքը

ՀՀ արդարադատության նախկին նախարար Գևորգ Դանիելյանը ֆեյսբուքյան իր էջում գրել էր, որ թյուր կարծիք է ձևավորվել այն մասին, որ իբր ԱՄՆ-ում ծնված հայ երեխան հենց միայն այդ հիմքով ազատվում է զինծառայությունից:Այս թյուրիմացության հիմքում այն իրողությունն է, որ ԱՄՆ-ում ծնված երեխան, հողի սկզբունքով ձեռք է բերում ԱՄՆ-ի քաղաքացիություն, սակայն մեր հայրենակիցները անտեսում են մի շարք տարրական իրավական հարցադրումներ: «Նախ, նույն այդ երեխան, միաժամանակ օրենքի ուժով ձեռք է բերում նաև Հայաստանի Հանրապետության քաղաքացիություն՝ անկախ ծնվելու վայրից և ծնողների համաձայնությունից, ինչը, իմ խորին համոզմամբ, խիստ խելամիտ իրավական լուծում է: Այսպիսով, երեխան ձեռք է բերում երկքաղաքացու կարգավիճակ, իսկ հայրենական օրենսդրությամբ երկքաղաքացին մեր պետության համար ճանաչվում է միայն որպես ՀՀ քաղաքացի՝ դրանից բխող բոլոր իրավական հետևանքներով հանդերձ: Ավարտեմ միտքս. այլ պետության քաղաքացիություն ընդունելը հայրենական օրենսդրությամբ հիմք չէ պարտադիր զինվորական ծառայությունից ազատելու համար»,- գրել էր Գևորգ Դանիելյանը: Հայտնի է, որ Հայաստանի մի շարք քաղաքական գործիչներ, բարձրաստիճան պաշտոնյաներ, հիղինակավոր անձիք մեկնում են ԱՄՆ՝ երեխա ունենալու համար: Բազմաթիվ պաշտոյաների կանայք վերը նշված փաստի համար էլ մեկնում են ԱՄՆ՝ ծննդաբերելու: Ի դեպ վերջին մի քանի ամիսներին Հայաստանից բացակայել է ոստիկանապետ Վլադիմիր Գասպարյանի փեսա, Դավիթաշենի նախկին թաղամասի թաղապետ, այժմ ԱԺ պատգամավոր Արթուր Գևորգյանը: hayeli.am-ի տեղեկություններով Արթուր Գևորգյանը կնոջ հետ մեկնել էր ԱՄՆ: Բանն այն է, որ նրանք սպասում էին իրենց երրորդ զավակին: Զույգն ուներ երկու դուստր, իսկ տղան ծնվել է ԱՄՆ-ում: Երեխան ստացել է Ամերիկայի քաղաքացիություն, սակայն ըստ վերը նշված  Գևորգ Դանիելյանի հաղորդագրության, տղան չի ազատվելու հայկական բանակում ծառայելուց: Ինչպես տեսնում եք «հայրենյաց պատգամավորները» շարունակում են «ապահովագրել» իրենց ընտանիքները և նրանցից հետ չի մնացել վերջինս: