Ղուկասյանը՝ Գյումրիում, Լոքյանը Վանաձորում, Սահակյանը՝ Աշտարակում, ով ում է «տակից» աջակցելու
Սեպտեմբերի 18-ին ՏԻՄ ընտրությունների առաջադրումների փուլն ավարտված է, սպասվածի պես ընտրություններին ակտիվ հայտ են ներկայացրել իշխող ՀՀԿ-ի ներկայացուցիչները: Վերջին տասնհինգ տարիների ընթացքում Հայաստանի քաղաքական դաշտի դեգրադացման եւ ընդդիմադիր քաղաքական ուժերի կազմալուծման հետ զուգահեռ ՏԻՄ ընտրությունները դարձան միայն իշխանությունների «մենաշնորհը»: Հայաստանում այսօր փաստացի միմիայն իշխանական կամ մերձ իշխանական քաղաքական ուժերն են թեկնածուներ առաջադրում, փոքրիկ շեղումներով: Միայն ԲՀԿ-ի, ՀՅԴ-ի եւ նորաստեղծ կուսակցությունների շարքերում է ՏԻՄ ընտրությունների նկատմամբ որոշակի ակտիվություն նկատվում, իսկ ընդդիմադիր դաշտի հնաբնկաներն ու տիտղոսակիրները կրկին ընդհատակում են: Հետաքրքիր է՝ ինչ ակնկալիք ունեն քաղաքական ուժերը ԱԺ ընտրություններից, եթե իվիճակի չեն ՏԻՄ ընտրություններին մասնակցել: Սեպտեմբերի 18-ին ՏԻՄ ընտրություններ տեղի կունենան Հայաստանի Արագածոտնի, Արարատի, Արմավիրի Սյունիքի եւ Տավուշի մարզերում: Նշված մարզերի 22 համայնքներում տեղի կունենան համայնքի ղեկավարի, 80 համայնքներում` ավագանու անդամների ընտրություններ: Իսկ 215 համայնքներում էլ միաժամանակ պետք է անցկացվեն համայնքի ղեկավարի եւ ավագանու անդամների ընտրություններ: Արագածոտնի մարզի Աշտարակ քաղաքում թեժ պայքար է ակնկալվում, ընտրություններին մասնակցելու համար առաջադրվել է 8 թեկնածու: Թեկնածուներից շատերն անկուսակցական են՝ համայնքի ղեկավար Արմեն Անտոնյանը, անհատ ձեռներեց Գեւորգ Եդիգարյանը, «Խարամ» ԱԿ ֆինանսական գծով տնօրեն Արշալույս Մեջլումյանը, որին սատարում է «Բարգավաճ Հայաստան» կուսակցությունը, Արագածոտնի մարզի վիճակագրական վարչության վիճակագիր Սերգեյ Մովսիսյանը, «Ավգոռ» ՍՊԸ գործադիր տնօրեն Թովմաս Շահվերդյանը, Ռազմիկ Տերտերյանը եւ ֆիզիկայի ուսուցիչ Հարություն Օհանյանը: Թեկնածուներից միայն մեկը՝ Աշոտ Ղալաչյանը, ՀՀԿ-ական է: Աշոտ Ղալաչյանը Աշտարակի նախկին քաղաքապետն է, Արագածոտնի նախկին մարզպետ Սարգիս Սահակյանի հետ քավորսանիկական հարաբերություններ ունի: Մինչդեռ Մեղրիում գործող քաղաքապետը առանց մրցակցության կրկին կստանձնի համայնքի ղեկավարումը: Փոքրիշատե մեծ է հետաքրքրությունը մեծ քաղաքների նկատմամբ: Վանաձորում եւ Գյումրիում պայքարի կնետվեն նաեւ ընդդիմադիրները: Այսօր «Քաղաքացիական պայմանագիր» կուսակցության վարչությունից հայտնեցին, որ կուսակցությունը մասնակցելու է Գյումրի եւ Վանաձոր քաղաքների ավագանու ընտրություններին: Գյումրիում այս անգամ էլ թեժ կլինի, ներգրավված են լինելու նաեւ կրիմինալ տարրերը, որոնք մամուլի հրապարակումների համաձայն կաջակցեն ԲՀԿ-ական Վարդեւան Գրիգորյանին, նրան կաջակցի նաեւ Վարդան Ղուկասյանը,որն այդպիսի խոստում է տվել նաեւ ՕԵԿ անդամ Հովհաննես Մարգարյանին: ՀՀԿ-ի թեկնածուն Սամվել Բալասանյանն է, կառաջադրվի նաեւ ԳԱԼԱ-ն: Վանաձորում նույնպես թեժ պայքար է ակնկալվում: Հանրապետական կուսակցության համամասնական ցուցակը գլխավորում է Մամիկոն Ասլանյանը: Նա դաշնակցական Դավիթ Լոքյանի մտերիմն : Մեր տեղեկություններով անցած շաբաթ վարչապետի հետ Վանաձոր այցելած դաշնակցական Լոքյանը բացահայտ քարոզչություն է արել ՀՀԿ-ի թեկնածուի օգտին: Այստեղ ընդդիմադիր թեկնածուների շարքում ամուր են Էդմոն Մմարուքյանի եղբոր՝ Քրիստ Մարուքյանի դիրքերը, ԲՀԿ-ն էլ առաջադրել է բժիշկ Այծեմնիկ Օհանյանին: Ընտրողը պետք է իմանա, որ նշյալ քաղաքներում սպասվող ընտրությունները ոչ միայն տեղական, այլ նաև համապետական նշանակություն ունեն և լուրջ հետևանքների կարող են հանգեցնել՝ երկար սպասված փոփոխությունների սկիզբ դնելով, նույնը պետք է հասկանա ընդդիմությունը, որ կարելի է <<ներքեւից>> փոխել իրավիճակը, եթե իհարկե, ունեն այդքան ռեսուրս: Անի Սահակյան