Դավադրություն էլ սարքեցիք՝ չանցավ, հող չեք հանձնի
Արցախի տարածքների հանձնելու վերաբերյալ խոսակցությունները կրկին ակտիվացել են, այդ մասին այլեւս չեն խուսափում բարձրաձայնել Հայաստանի ու Արցախի բարձրագույն իշխանության ներկայացուցիչները ։ Ֆրանսիայի խորհրդարանի էլեկտրոնային թերթին տված հարցազրույցում Արցախի նախագահ Բակո Սահակյանը պատասխանելով փոխզիջումների մասին հարցին, ասել է, որ որևէ հակամարտության լուծում, հատկապես երբ դա այնքան բարդ է, որքան Լեռնային Ղարաբաղինը, կարող է իրականացվել միայն փոխզիջումների միջոցով։ «Ողջամիտ, իրավացի և համարժեք փոխզիջումներն անհրաժեշտ են», - հավելել է նա՝ շարունակելով․ - «Մենք պատրաստ ենք անել փոխզիջումներ, եթե դրանք չեն խաթարում մեր երկրի անվտանգությունը, եթե դրանք չեն հանդիսանում պատեհ առիթներ մեր հակառակորդի համար՝ մեզ վրա նոր հարձակումներ գործելու»։Նա ընդգծել է նաեւ. «Ղարաբաղի հիմնախնդրի լուծմանն ուղղված բանակցությունների համար նոր փուլ կբացվի, եթե Ադրբեջանը հարգի 1994 թվականի հրադադարի համաձայնագիրը, Լեռնային Ղարաբաղը նորից միանա բանակցություններին և հաղթահարվեն հոգեբանական արգելքները, որոնք գալիս են Ադրբեջանի վրեժխնդիր քաղաքականությունից»։ «Թալին» ջոկատի հրամանատար Սարգիս Կարապետյանը վստահ է, որ իշխանությունները պատրաստվում են «հող հանձնել». «Ես միշտ ասել եմ, հիմա էլ պիտի կրկնեմ՝ հայ ժողովուրդը ուրիշ թշնամի չունի, նա մեկ թշնամի ունի, դա մեր երկրի իշխանավորներն են՝ նախկին, ներկա, իրենց հանցախմբով։ Ադրբեջանը չի եղել ու չի էլ կարող լինել մեր թշնամին, մենք Ադրբեջանը մի շաբաթում հինգ անգամ կարող ենք գրավել, հինգ անգամ էլ հետ տալ։ Մեր թշնամին մեր ղեկավարներն են» ասաց նա։ Սարգիս Կարապետյանի խոսքով՝ ամենեւին էլ պատահական չէր ապրիլյան դեպքերը, որին ըստ իրեն «քառօրյա պատերազմ» բնորոշումը տվեցին, մինչդեռ իրականում ըստ ազատամարտիկի բոնորշմամբ՝ սովորական դավադրություն էր. «Ես Թալիշում եմ եղել ու պնդում եմ, որ այդ ամենը դավադրություն էր։ Ու երբ տեսան, որ հայ զինվորը հաղթանակ է տանում եւ երեւացող թշնամուն եւ թիկունքից խփող ղեկավարներին, անվանեցին քառօրյա պատերազմ, բերեցին հաշտություն կնքեցին»։Կարապետյանը չմանրամասնեց, թե դավադրությունն ում կողմից էր կազմակերպվել եւ ինչ նպատակով, ասաց միայն.«Դավադրությունը էս իշխանության կողմից էր՝ ամենաբարձրյալի գլխավորությամբ»։ Սարգիս Կարապետյանը նկատեց, որ երեք նախագահներն էլ նույն սկզբունքներով են առաջնորդվել.«Դուք երեքից էլ կարող եք հարցնել՝ իրենք հայ են, թե՞ թուրք»։ Կարապետյանը խոսքով՝ իշխանություններն «իրենց գլխի գալիքը» չգիտեն, եթե իրականացնեն այդ դավադիր ծրագիրն ու առանց դիմադրության հող հանձնեն, տեղի կունենա անխուսափելին .«Հային պակասում է միաբանվելը, բայց թող չկասկածեն, դա էլ կլինի»,- ասաց Կարապետյանն ու նկատեց, որ իշխանությունը հենց այդ միասնությունից է վախենում ու ամեն ինչ անում, որպեսզի պառակտի ժողովրդին.«Երբ որ ապրիլյան պատերազմի ժամանակ չկարողացան իրենց նպատակին հասնել, մի քանի հարյուր երեխա պիտի մորթվեին եւ հողերը պետք է հանձնեին ու իրենք էլ արդարանային, թե չկարողացանք, բայց երբ տեսան, որ հայ զինվորը աշխարհում ամենաուժեղն ու հզորն է, գնացին հրադադարի, հետո սարքեցին էս կապիկությունը Երեւանի մեջ։ «Սասնա ծռեր» ըտենց բան չկա, էդ տղերքը չգիտեն, թե ինչ են արել», ասաց Կարապետյանը ու զրույցի այս հատվածից այլեւս չցանկացավ շարունակել։ Անի Սահակյան