Սուրիկ Խաչատրյանի վերջին « շանսը»
ՏԻՄ ընտրություններն աննախադեպ իրավիճակ են ստեղծել Սյունիքի մարզում, այստեղ բոլոր ժամանակների ահուսարսափ, տերուտնօրեն Սուրիկ Խաչատրյանն այժմ ոչ նախանձելի վիճակում է։ Բոլոր քաղաքներում մշտապես դրածոն ղեկավարներ ունեցող Լիսկային այս ընտրություններին անխնա մերժում են։ Վերջին հույսը Կապանն է։ Հոկտեմբերի 2-ին Ղափանում կայանալիք քաղաքապետի ընտրություններում առաջադրվելու է գործող քաղաքապետ Աշոտ Հայրապետյանը, որն նույնպես Սուրիկ Խաչատրյանի թիմից է։ Ղափանի նախկին քաղաքապետ, դաշնակցական Արթուր Աթայանը նույնպես առաջադրվելու ցանկություն ունի։ Ըստ լուրերի՝ Սուրիկ Խաչատրյանը ոտուձեռ է ընկել, ամեն ինչ անում է, որպեսզի Աթայանը հրաժարվի քաղաքապետ դառնալու մտադրությունից, հակառակ պարագայում Սուրիկ Խաչատրյանը կկորցնի մեծ քաղաքների նկատմամբ իր ազդեցությունեը։ Ի դեպ, մեկ անգամ արդեն եղել է նման բան. Արթուր Աթայանը Լիսկայի ճնշումների տակ հանել է իր թեկնածությունը Ղափանի քաղաքապետի պայքարից։ Նա իր հայտարարության մեջ նշել էր, որ «օրեցօր մարզկենտրոնում շիկանում է մթնոլորտն ու կապանցու քվեին արժանանալու համար կիրառվում են անընդունելի մեթոդներ, որ իր կողքին կանգնած մարդիկ ենթարկվում են հոգեբանական, ֆինանսական ճնշումների»: Կկրկնվի՞ այս անգամ նույն իրողությունը, թե ոչ՝ պարզ կլինի առաջիկա օրերին, սակայն հաշվի առնելով Աթայանի կուսակցական պատկանելությունը կարելի է չկասկածել, որ սույն անձնավորությունը տեղի կտա ոչ միայն ճնշումներին, այլեւ կգնա ամենաանհավանական գործարքների։ ԲՀԿ-ն Կապանում նույնպես թեկնածու կունենա ՝ Արթուր Մարտիրոսյանը, որը Կապանի ԲՀԿ տարածքային խորհրդի նախագահն է, Կապանի զորամասի նախկին հրամանատարը։ Տեղեկացրել ենք արդեն, որ Գորիսի հետ կապված էլ Լիսկայի պլաններն անիրագործելի մնացին։ Նա այստեղ ցանկանում էր տխրահռչակ որդուն քաղաքապետ դարձնել, բայց կուսակցության վերնախավը ոչ միայն որդու հարցում մերժեց, այլ՝ հորեղբորորդու։ Արդեն իսկ տեղեկություններ կան մարզպետի հորեղբորորդին՝ «Որոտան-Կասկադի» տնօրեն Սասուն Խաչատրյանը նույնպես չի ներկայացնի ՀՀԿ-ն։ Կառաջադրվի գործող քաղաքապետ Վաչագան Ադունցը։ Սիսիան քաղաքում եւս Լիսկան առանց հենարանի կմնա։ ՀՀԿ-ն կաջակցի գործող քաղաքապետ, փետրվարյան իրադարձություններից հետո ԲՀԿ-ն լքած Աղասի Հակոբջանյանին, որը դեռեւս անկուսակցական է։ Շրջանառվում են այլ թեկնածուների անուններ եւս՝ Սյունիքի մարզպետարանի գյուղատնտեսության վարչության պետ Սամվել Թանգյանի, նախկին քաղաքապետ Լավրենտ Սարգսյանի որդու՝ Արթուր Սարգսյանի անունները։ Լուրեր կան, որ Արթուր Սարգսյանը մարզպետ Խաչատրյանի թիմից է ու նա ամեն ինչ անելու է Սիսիանը Հակոբջանյանից վերցնելու համար։ Այդուհանդերձ առաջիկայում պարզ կդառնա կհաջողվի Սուրեն Խաչատրյանին, թե ոչ։ Սիսիանում թեժ մրցակցությունն իր թեկնածությամբ կխթանի նաեւ «Լուսավոր Հայաստանի» շարքերը համալրած Սրբուհի Գրիգորյանը: Նա լրագրող է, Սիսիանի ավագանու անդամ, «Լուսավոր Հայաստան» կուսակցության տեղի գրասենյակի ղեկավարը: Այսպիսով՝ ակնհայտ է դառնում, որ ոչ բացահայտ, բայց սահմանափակվում է Սուրիկ Խաչատրյանի ազդեցության տիրույթը, թեպետ նա բացահայտ պայքարում է իր ազդեցությունը պահելու համար, բայց իշխանության պահվածքից երեւում է, որ չեն պատրաստվում հանդուրժել դա։ Չնայած ով գիտե, ինչ կարող է լինել ընտրություններից հետո, ամենակարող մարզպետի թուրը կտրում է բոլոր տեղերում ու բոլորի մոտ, գուցե ընդամենը արտաքին ֆոն են ստեղծում, թե հրաժարվում են Խաչատրյանի ծառայություններից, միեւնույն ժամանակ նրան գործելու լայն հնարավորություն տալիս։ Անի Սահակյան
Հետևեք մեզ Viber-ում
