Ռուսաստանը պետք է չգնար Ադրբեջանին զենքի մատակարարելու քայլին. Ա. Նավասարդյան

«2016թ. ամառը գերակտիվ եղավ համաշխարհային, տարածաշրջանային և առանձին խաղացողների համար։ Պայքարը, որ հիմա ընթանում է ՌԴ-ի ու ԱՄՆ-ի միջև բազմաբևեռ աշխարհի ստեղծման համար, այսօր մտել է շատ կարևոր փուլ, ու ընդգրկում է նաև Հարավային Կովկասի տարածաշրջանը ու անդրադառնում նաև Հայստանի արտաքին, ներքին քաղաքականության վրա։ Իսկ ինչո՞ւ հենց հիմա Ռուսաստանը որոշեց նման ակտիվ, հարձակվողական դիրքորոշում ցուցաբերել: Պատճառն այն է, որ ԱՄՆ-ի վարած «անակոնդա» քաղաքականության հետևանքով ՌԴ-ն շրջափակված է ՆԱՏՕ-ի ազդեցության տակ ընկնելու համար, ինչը նրան շատ է անհանգստացնում և փորձում է բոլոր վեկտորներով աշխուժացնել իր դիվանագիտական գործունեությունը»,- այսօր լրագրողների հետ հանդիպման ընթացքում նման կարծիք հայտնեց Հայ-ռուսական  համալսարանի համաշխարհային քաղաքականության և միջազգային հարաբերությունների ամբիոնի վարիչ, Արտակարգ և լիազոր դեսպան Արման Նավասարդյանը: Արտակարգ եւ լիազոր դեսպան Արման Նավասարդյանի կարծիքով՝ Ռուսաստանը պետք է չգնար Ադրբեջանին զենքի մատակարարելու քայլին։ Այն,  որ Ռուսաստանը,  նախագահի մակարդակով,  ասում է, թե եթե իրենցից չգներ, Ադրբեջանը  ուրիշներից էր գնելու,  իրականությանը չի  համապատասխանում «Հավատացնում եմ «Տոս 1Ա»-ն եւ «Ս 400 –ը» ոչ մի տեղ բացի Ռուսաստանից, ԱՄՆ-ից եւ եթե չեմ սխալվում Անգլիայից՝ չեն կարող առնել; Նրանք չեն վաճառում, սակայն Ռուսաստանը վաճառում է, քանի որ Ռագոզինի նման մարդիկ ասում են,  որ վաճառել են եւ վաճառելու ենք։ Ռուսաստանին մենք պետք է կարողանանք հասկացնել, որ իրենց   արեւելյան քաղաքականության մեջ եղել են վրիպումներ եւ հիմա էլ կարող են լինել »,-ասաց նա։