Պատերազմի սարսափները այլևս երբեք չպետք է կրկնվեն. Ճապոնիայի վարչապետ

Ժամանակակից հանրությունը պետք է ջանքեր գործադրի, որպեսզի պատերազմի սարսափներն այլևս երբեք չկրկնվեն։ Այս մասին հայտարարել է Ճապոնիայի վարչապետ Սինձո Աբեն Երկրորդ համաշխարհային պատերազմի զոհերի հիշատակի արարողությանը՝ նվիրված Ճապոնիայի կապիտուլյացայի 71-ամյակին։ «Մենք չենք մոռանում այսօր ձեռք բերված խաղաղության և բարգավաճման համար զոհված մարդկանց։ Պատերազմի սարսափները չպետք է կրկնվեն»,- ասել է նա։ Վարչապետը իր ելույթում չի նշել, որ պատերազմի ժամանակ տուժել են Ասիայի երկրները։ Այդ ձևակերպումն օգտագործել են Աբեի նախորդները կառավարության ղեկավարի պաշտոնում։ Վարչապետը նաև «երբեք չկռվելու երդումներ» չի տվել, ինչը 19 տարիների ընթացքում պարտադիր կերպով արել են Աբեի բոլոր նախորդները։ Աբեն խախտել է այդ ավանդույթը 2013 թվականին։ Այնուհետև հայտարարվել է լռության րոպե՝ ի հիշատակ պատերազմի զոհերի։