Ջրհեղեղ ԱՄՆ Լուիզիանա նահանգում

3 մարդ է զոհվել, ավելի քան հազար մարդ կարիք ունի տարհանման ԱՄՆ Լուիզիաիան նահանգում իր ուժով աննախադեպ ջրհեղեղի հետևանքով, հայտնում է NBC News-ը՝ հղում կատարելով նահանգի նահանգապետ Ջոն Էդվարդսի հայտարարությանը: Հորդառատ անձրևները շրջանում մի քանի ջրհեղեղի պատճառ են դարձել: Էդվարդսը նահանգում արտակարգ դրություն է հայտարարել: Նրա խոսքով՝ մարդկանց փրկելու նպատակով անհրաժեշտ է ուղարկել նավակներ և ուղղաթիռներ: Եղանակի կանխատեսումների համաձայն՝ անձրևները նահանգում կշարունակվեն: «Քանի որ դա ռեկորդային ջրհեղեղ է, մենք չգիտենք, թե որքան կբարձրանա ջուրը նահանգի շրջաններում»,- ասել է Էդվարդսը: Ներկայում հայտնի է 3 զոհի մասին, 1 տղամարդ անհետ կորած է համարվում: