Քավոր, սանիկ, նոտար.ինտրիգային ընտրություններ Վանաձորում
Հայաստանի ՏԻՄ ընտրություններն այս տարի առանձնահատուկ հետաքրքրություն են առաջացրել: Նախ, որ փոխվել է երկու խոշոր քաղաքների ընտրական մոդելն ու Գյումրիում ու Վանաձորում նոր Ընտրական օրենսգրքի սահմանմամբ կուսակցությունների համամասնական ցուցակներից ավագանի են ընտրելու, ապա նոր քաղաքապետ, ինչպես Երեւանում է: Բբացի դրանից ՏԻՄ ընտրությունները հետաքրքրական են 2017-ի խորհրդարանական ընտրություններից առաջ ու հատկապես ընդդիմադիր կուսակցությունների համար դրանք յուրօրինակ ստուգատես են լինելու: Մասնավորապես նորաստեղծ երիտասարդական կուսակցությունների, որոնք մերժում են հներին ու խոստանում, որ իրենք նոր մշակույթ են բերում: Օրինակ Վանաձորում ընդդիմության ֆավորիտ թեկնածուն լինելու է Լուսավոր Հայաստան կուսակցության նախագահ Էդմոն Մարուքյանի եղբայրը՝ Քրիստ Մարուքյանը: Նա է գլխավորելու կուսակցության ավագանու ցուցակը: Վանաձորում 2012-ի խորհրդարանական ընտրություններից հետո, երբ թիվ 30 ընտրատարածքում պատգամավորի մեծամասնական ընտրակարգով ընտրվեց անկուսակցական փաստաբան-իրավապաշտպան Էդմոն Մարուքյանը, շատերը սա պայմանավորեցին Վանաձորում քաղաքացիական հասարակության ինստիտուտի կայացմամբ: Եւ որ երիտասարդ փաստաբանը, վերլուծությունների համաձայն, կարողացել էր ճիշտ քարոզչություն վարել ու վերահսկել նախընտրական ու ընտրական գործընթացները: Չնայած դրան հակառակ պնդումներն այն մասին էին, որ ոչ թե Մարուքյանը հաղթեց, այլ ժողովուրդը չներեց նրա մրցակից, երբեմնի անկախ, բայց ընտրություններից առաջ ՀՀԿ-ին անդամագրված Վիկտոր Դալլաքյանին հայտնի այն արտահայտության համար, որ ինքը քարոզչություն էլ չանի, կոստյումի թեւն էլ ուղարկի, հաղթանակն իր օգտին է լինելու: Բնականաբար խորհրդարանական ու ՏԻՄ ընտրություն երը մեծապես տարբերվում են իրարից, սակայն ոչ այս հարցում, քանի որ վանաձորցիների գլխին գործող քաղաքապետ Սամվել Դարբինյանը իսկական պատուհաս է դարձել, նրա արկածախնդրությունների ու սկանդալների մասին մամուլը անդրադարձել է: Ուստիեւ մեծ հաշվով իրավիճակը նպաստավոր է, քանզի ակնհայտ է, որ վանաձորցինրը փոփոխության մեծ ակնկալիքներ ու սպասումներ ունեն: Հետաքրքրական է նաեւ այն, թե ընտրություններին ինչ մարտավարություն է որդեգրելու Լուսավոր Հայաստանը եւ արդյոք այն հաջողություն է գրանցելու: Հրազդանում ինչպես տեսանք Նիկոլ Փաշինյանի հռչակած վստահված անձանց մեխանիզմը չարդարացրեց իրեն: Ըստ մամուլի հրապարակումների, այստեղ ընտրական գործընթացներում էական ազդեցություն գործեց փողը: Վանաձորում արդյոք քաղաքացիական հասարակությունը կկարողանա հասարակական գիտակցումն այն աստիճանի հասցնել, որ փողի գործոնը, որն անհաղթահարելի է թվում, ի չիք դառնա, ցույց կտան ընտրությունների արդյունքները: Այստեղ թեժ մրցապայքար է սպասվում: ՀՀԿ թեկնածու Մամիկոն Ասլանյանն է,սակայն մարզի ՀՀԿ-ականները այնքան էլ չեն ընդունում նրա թեկնածությունը: Մամուլը գրեց, որ նա դաշնակցական Դավիթ Լոքյանի մտերիմն է։ Լոքյանն է վերջինիս նշանակել նոտար, որտեղից էլ նրան նկատել են հանրապետականներն ու որոշել քաղաքապետի թեկնածու առաջադրել։ Ավելի ամուր է «Հայկական վերածնունդ» կամ նախկին ՕԵԿ-ի թեկնածու, ավագանու անդամ, կուսակցության Վանաձորի կառույցի ղեկավար Արկադի Փելեշյանի դիրքերը:
Փելեշյանը ԱԺ փոխնախագահ Էդվարդ Շարմազանովի սանիկն է, նաեւ հայտնի ռեժիսոր, վավերագրող, սցենարիստ Արտավազդ Փելեշյանի բարեկամն է, բայց Վանաձորում ունի կիսաքրեական համբավ:
Անի Սահակյան