Մոսկվան զգուշացրել է

Ռուսաստանի ԱԳ նախարարությունը գործընկերներին կոչ է արել Կիեւին զգուշացնել վտանգավոր քայլերից, որոնք կարող են ամենաբացասական հետեւանքներ ունենալ: Համապատասխան հայտարարությունը օգոստոսի 11-ի առավոտյան տեղադրվել է նախարարության կայքում: «Կրակի հետ խաղալը լավ հետեւանք չի ունենա»,- նշել են Սմոլենսկի հրապարակում: «Կցանկանայինք նաեւ ինչպես Կիեւին, այնպես էլ նրա արտասահմանյան համակարգողներին նախազգուշացնել, որ ռուսական կողմին պատճառված վնասը, ռուս զինծառայողների սպանությունն առանց հետեւանքների չեն մնա»,- հավելել են արտաքին քաղաքականության գերատեսչությունում: Արտգործնախարարության հայտարարության մեջ նաեւ նշված է, որ Ուկրաինայի նախագահ Պյոտր Պորոշենկոն «մշտապես հոխորտում է բռնակցված Ղրիմը վերադարձնելու պայքարում ԱՄՆ-ի, ՆԱՏՕ-ի եւ Եվրամիության անվերապահ աջակցությամբ»: «Այսպիսի հռետորության հանդեպ Արեւմուտքի ներողամտությունը բացական դեր է խաղում Ուկրաինայի ղեկավարության կողմից ռուսական Ղրիմում զինված սադրանքներ կազմակերպելու հանցավոր որոշումներ ընդունելիս»,- ընդգծել են նախարարությունում: Ավելի վաղ Ուկրաինայի նախագահ Պյոտր Պորոշենկոն հանձնարարել է Ղրիմի եւ Դոնբասի սահմաններին տեղակայված բոլոր ստորաբաժանումները բերել ուժեղացված մարտական պատրաստվածության: Այսօր նաեւ հայտնի է դարձել, որ Ուկրաինայի հարավում օգոստոսի 10-ին սկսվել են պլանավորված զորավարժություններ: Այս իրադարձություններին նախորդել է Ղրիմում ՌԴ Անվտանգության դաշնային ծառայության աշխատակիցների կողմից ուկրաինացի «դիվերսանտների խմբի» ձերբակալությունը: Ինչպես պնդում են հատուկ ծառայությունները, նրանք թերակղզում ահաբեկչական գործողություններ էին պատրաստել: Ձերբակալելիս զոհվել է ՌԴ իրավապահ մարմինների երկու աշխատակից: