Պուտին-Ալիև հանդիպման «առաջին ծիծեռնակները»` Սերժ Սարգսյանի այցից առաջ

Հայտնի է դարձել Պուտինի` Բաքու կատարած այցի ու բանակցությունների առաջին պտուղներից մեկը: Բաքվում կբացվի ուղղաթիռային կենտրոն և ինքնաթիռների հավաքման գործարան: «Ռուսաստանը, որպես լավ և ոչ թանկարժեք զենքի մատակարար, հետաքրքիր է Ադրբեջանին և Իրանին», - կարծիք է հայտնել Ռուսաստանի փոխվարչապետ Դմիտրի Ռոգոզինը՝ Բաքվում Ռուսաստանի, Ադրբեջանի և Իրանի նախագահների գագաթաժողովից առաջ։ Ռոգոզինը նաև ասել է, որ Ադրբեջանը հետաքրքրված է Ռուսաստանից МС-21 օդանավերի գնմամբ և ակնկալում է 2017 թվականի փետրվարին 10 օդանավի գնման շուրջ պայմանագիր ստորագրել։ Ռուսաստանի փոխվարչապետը հայտնել է, որ Բաքվում կբացվի ուղղաթիռային կենտրոն և ինքնաթիռների հավաքման գործարան. «Այստեղ խորհրդային արտադրության շատ ինքնաթիռներ և ուղղաթիռներ կան։ Դրանց արդիականացումը, սպասարկման ծառայություններն այժմ կիրականացվի Ադրբեջանի տարածքում»։ Եթե հաշվի առնենք այն հանգամանքը, որ զենքի վաճառքի նոր համաձայնագրերի մասին ևս տեղեկատվություն տարածվեց դեռ մինչև Պուտինի այցը, և դատելով Պուտինի Բաքու կատարած այցի ընթացքում հնչեցրած հայտարարությունները, տնտեսական համագործակցության տարածաշրջանային ծրագրերը, ապա պարզ է դառնում, թե Ռուսաստանն ինչ աստիճանի է գնահատում Ադրբեջանին` որպես ռազմավարական գործընկեր: Ադրբեջանը, Թուրքիան և Ռուսաստանը կստեղծեն համագործակցության եռակողմ ձևաչափ, ասել է Թուրքայի նախագահ Ռեջեփ Էրդողանը Սանկտ Պետերբուրգում Ռուսաստանի նախագահ Վլադիմիր Պուտինի հետ համատեղ մամլո ասուլիսում: Ու այս ամենը տեղի է ունենում` այսօր Սերժ Սարգսյանի մոսկովյան հանդիպման նախաշեմին: Սա ինքնին խոսում փաստ է, թե ինչպես Մոսկվան խոսելու Սերժ Սարգսյանի հետ: Սերժ Սարգսյանը Ռուսաստանի նախագահ Վլադիմիր Պուտինի հրավերով այսօր կմեկնի Մոսկվա։ Հայաստանի նախագահի աշխատակազմի հասարակայնության և տեղեկատվության միջոցների հետ կապերի վարչության փոխանցմամբ, այցի շրջանակներում բարձր մակարդակի բանակցությունների ընթացքում նախատեսվում է քննարկել ռազմավարական գործընկեր երկու պետությունների միջև մի շարք ոլորտներում քաղաքական, առևտրատնտեսական, հումանիտար, երկկողմ փոխգործակցության օրակարգի առանցքային հարցեր, ինչպես նաև Եվրասիական տարածում ինտեգրացիոն գործընթացների զարգացմանը վերաբերող հարցեր։ Սերժ Սարգսյանը և Վլադիմիր Պուտինը մտքեր կփոխանակեն նաև միջազգային և տարածաշրջանային մի շարք արդիական խնդիրների շուրջ։ ՀՀ և ՌԴ նախագահների մամլո ծառայությունները նույն հաղորդագրություն են տարածել։ Հաղորդագրություններում չի հիշատակվում ղարաբաղյան հիմնախնդիրը։ Ռուսական «Նովոստի» պետական լրատվական գործակալությունը, իր վերլուծական հոդվածում գրում է, որ Պուտինը և Սարգսյանը հենց ղարաբաղյան խնդիրն են այսօր քննարկելու։ Գործակալությունը նշում է, որ Հայաստանում իրավիճակը բարդ է, որ հայկական որոշ ընդդիմադիր կուսակցություններ ֆինանսավորվում են Արևմուտքից և մտադիր են տապալել գործող իշխանություններին։ Ինչը, հոդվածի հեղինակի կարծիքով, ինքնասպանություն է ղարաբաղյան խնդիր ունեցող Հայաստանի համար։ Իսկ ղարաբաղյան հակամարտությունն էլ հայտնվել է գերտերությունների հետաքրքրությունների խաչմերուկում։ «Այն վճռականությունը, որ ցուցաբերել է Սերժ Սարգսյանը ոստիկանության պարեկապահակային ծառայության (ՊՊԾ) գնդի տարածքի գրավման հարցում թույլ է տալիս հուսալ, որ Սարգսյանը պատրաստ է երկրի տնտեսության հարցերում լուրջ քայլերի գնալ և մտադիր է Պուտինին փոխանցել կոնկրետ առաջարկներ, սակայն Պուտին-Սարգսյան հանդիպման առանցքային հարցը Ղարաբաղն է լինելու», - ասվում է հոդվածում։ Հոդվածագիրը նաև կարծիք է հայտնում, որ ապրիլյան քառօրյա պատերազմից հետո Պուտինը դարձել է Ադրբեջանի և Հայաստանի միջև միակ հեղինակավոր միջնորդը և Վաշինգտոնին սա դուր չի եկել։ «Դրա համար Արևմուտքը կազմակերպել է ՊՊԾ գնդի տարածքի գրավումը Հայաստանում, որի նպատակն էր տապալել Ալիևի և Սարգսյանի միջև նախնական պայմանավորվածությունները», - գրել է ռուսաստանցի լրագրողը։ Ըստ «Նովոստի»-ի, Սերժ Սարգսյանի համար արդեն բարդ կլինի գնալ զիջումների, և հենց այս իրողությունն է Հայաստանի նախագահը փորձելու հասցնել Պուտինին այսօրվա բանակցությունների ժամանակ։ Ահա այսպիսի աշխարհաքաղաքական թնջուկի մեջ է տեղի ունենալու Սերժ Սարգսյանի հանդիպումը Սերժ Սարգսյանի հետ: Իրավիճակն իսկապես  խառնաշփոթ է հիշեցնում: ՊՊԾ գնդի գրավումից սկսած` ղարաբաղյան կարգավորման շուրջ ստեղծված իրավիճակով: Մետաքսյա Շալունց