ՕՊԵԿ-ը բարձրացրել է նավթի պահանջարկի կանխատեսումը

Նավթ արտահանող երկրների կազմակերպությունը (ՕՊԵԿ) 2016 թվականի համար նավթի պահանջարկի կանխատեսումը օրական 30 հազար բարելից բարձրացրել է մինչեւ 94,26 մլն բարել: Ըստ Ինտերֆաքսի՝ այս մասին նշված է կարտելի ամենամսյա տեղեկագրում: ՕՊԵԿ-ն ակնկալում է, որ հյուսիսային կիսագնդում ձմռան գալը կօգնի նավթի շուկայում հավասարակշռությունը վերականգնել: «Նավթ սպառող մի շարք խոշոր տնտեսությունների աճը, ինչպես սպասվում է, կնպաստի մոտակա ամիսներին նավթի սպառման մեծացմանը, հատկապես հյուսիսային կիսագնդում ձմռան սկզբին: Բացի այդ՝ նավթի պահանջարկի աճին զուգահեռ՝ Brent, WTI եւ Dubai մակնիշների նավթի պայմանագրերում առկա կոնտանգոն կկրճատվի, որն ավելի քիչ շահավետ կդարձնի նավթի պաշարների ստեղծումը: Այս գործոնը հետագայում կնպաստի  պաշարների կրճատմանը եւ շուկայի վերահավասարակշռմանը»,- նշված է տեղեկագրում: 2017 թվականին նավթի համաշխարհային պահանջարկի աճի կանխատեսումը պահպանվել է օրական 1.15 մլն բարել մակարդակում (օրական մինչեւ 95.41 մլն բարել): ՕՊԵԿ նավթի պահանջարկը 2016 թվականին կաճի  օրական 1.9 մլն բարել եւ կհասնի  օրական 31.9 մլն բարելի, 2017 թվականին՝ կավելանա օրական մինչեւ 33 մլն բարել: Կողմնակի աղբյուրների տվյալներով՝ հուլիսին կազմակերպության անդամները օրական արդյունահանել են 33.11 մլն բարել: