«Նոր Թուրքիան»` նացիստական, կամ Օսմանյան Թուրքիան է

Մի քանի միլիոնանոց հանրահավաք` ի պաշտպանություն Էրդողանի Թուրքիայի նախագահ Ռեջեփ Էրդողանը երկրում տեղի ունեցած ռազմական հեղաշրջման անհաջող փորձից հետո երեկ Ստամբուլի Յենիքապի շրջանում կազմակերպեց իրեն աջակցող մեծամասշտաբ հանրահավաք: Առհասարակ, վերջին երեք շաբաթների ընթացքում ի պաշտպանություն Էրդողանի հանրահավաքներ էին տեղի են ունենում ամեն գիշեր, սակայն ամենամեծը դա երեկ կազմակերպված հանրահավաքն էր, որին մասնակցեն մի քանի հարյուր հազար մարդ, այն կոչվում էր` «Դեմոկրատիա և նահատակների երթ»: «Հաղթարշավը պատկանում է դեմոկրատներին, իսկ հրապարակները պատկանում են մարդկանց»,- ասվում էր հասարակությանը բաժանվող թերթիկներում: Այնտեղ նաև նշված է, թե ինչպես քաղաքային տրանսպորտով անվճար հասնել նշված վայր: Ստամբուլում բազմահազարանոց հանրահավաքում, որին տարբեր տվյալներով` 1-5 մլն մարդ է մասնակցել ողջ երկրում, Էրդողանը կրկին ԱՄՆ-ում բնակվող քարոզիչ և հասարակական գործիչ Ֆեթհուլլահ Գյուլենին մեղադրեց չհաջողված հեղաշրջման կազմակերպման համար։ Էրդողանը կոչ է արել ավերել Գյուլենի կազմավորած ցանցն օրինական մեթոդներով և խոստացել է վերականգնել երկրում մահապատիժը, եթե դրա օգտին քվեարկի խորհրդարանը։ Իր ելույթում Էրդողանը նշել է. «Ռազմական հեղաշրջման փորձի կանխումը ցույց տվեց, որ այս երկիրն անպարտելի է: Հուլիսի 15-ի գիշերը Թուրքիայի փողոցներ ու հրապարակներ դուրս եկած միլիոնավոր քաղաքացիները կհաղթեին անգամ մահվանը: Եղան մարդիկ, ովքեր զոհվեցին ու հասան շեհիթների աստիճանին: Նրանք ոսկե տառերով իրենց անունը գրեցին պատմության մեջ: Հավատացեք, որ հանուն հայրենիքի պայքարում այդ աստիճանին հասնելը տրված չէ բոլորին: Այսօր այս հրապարակում հավաքվել են բոլորը՝ նախագահը, վարչապետը, Գլխավոր շտաբի պետը, Ժողովրդահանրապետական և Ազգայնական շարժում կուսակցությունների նախագահները, երկրի բոլոր 81 նահանգների հասարակական տարբեր շերտերի ներկայացուցիչները: Հավատացեք, որ տեսնելով դա՝ մեր թշնամիները վշտացել են, ինչպես հուլիսի 16-ին: Հուլիսի 15-ի դեպքերը Թուրքիայի ընկերներին ցույց տվեցին, որ այս երկիրը կարող է դիմակայել ոչ միայն քաղաքական, տնտեսական ու դիվանագիտական մարտահրավերներին, այլև ռազմական խափանարար գործողությանը: Թուրքիային չես կոտրի, այս երկիրը չի շեղվի իր ուղուց»: Թուրքիայի վարչապետ Բինալի Յըլդըրըմը «Ժողովրդավարության ու շեհիթների համար» կազմակերպված հանրահավաքին` նշել է. «Թուրք ազգը, որը պատմության մեջ կերտել է Չանաքքալեի (Դարդանել) հերոսական էպոսը, հուլիսի 15-ին կրկին ցուցաբերեց հերոսություն: 2016թ. հուլիսի 15-ը օրացույցի մեջ մտավ որպես Թուրքիայի երկրորդ Ազատագրական պատերազմի օր: Շեհիթների շնորհիվ այսօր մենք այս հողում ապրում ենք պատվով, ազատորեն ու եղբայրական մթնոլորտում: Նրանք կարծում էին, թե օգտվելով զինվորական հանդերձանքից՝ կարող են օկուպացնել մեր տարածքները, կարծում էին, թե կարող են կոտրել ժողովրդի կյանքը: Հեղաշրջման փորձի յուրաքանչյուր նոր կանխում մեզ ավելի ուժեղ է դարձնում: Այդպես եղավ նաև հուլիսի 15-ին»: Իսկ Թուրքիայի զինված ուժերի Գլխավոր շտաբի պետ, բանակի գեներալ Հուլուսի Աքարը ողջունել է ժողովրդի հերոսությունը, որը կանխել է երկրում տեղի ունեցած ռազմական հեղաշրջման փորձը, ինչպես նաև կոչ է արել պատասխանատվության ենթարկել Ֆեթհուլլահ Գյուլենի ահաբեկչական կազմակերպության բոլոր համակիրներին: Աքարը ասել է. «Հուլիսի 15-ին Գյուլենի ահաբեկչական խումբը, որը ներթափանցել է պետական կառույցներ, այդ թվում նաև՝ Թուրքիայի զինված ուժեր, կատարել է դավաճանության չտեսնված ակտ: Դավաճանություն է իրականացվել հայրենիքի, ազգի և ժողովրդավարության հանդեպ: Նրանց գործողությունները «սև բիծ» դարձան Թուրքիայի զինված ուժերի քաջության ու հաղթանակների պատմության մեջ: Ահաբեկիչները արժանի պատասխան են ստացել Թուրքիայի ժողովրդից ու զինված ուժերից: Ժողովրդին դավաճանածները կստանան ամենախիստ պատիժը»: Միանշանակ է, որ Թուրքիայում ռազմական հեղաշրջման փորձից թուրքական իշխանությունների գործողություններն արդեն նմանվում են նացիստների գործողությունների հետ: Նա զբաղված է այժմ երկրում ամրապնդելով իր իշխանությունը՝ սահմանափակելով քաղաքացիական ազատությունները: Արդեն իսկ ձերբակալվել են մի քանի տասնյակ հազարավոր մարդիկ: Էրդողանը  Թուրքիան տանում է դեպի տոտալիտար ռեժիմ: Այսպիսին է ՆԱՏՕ-ին անդամ, ԵՄ-ի գործընկեր` այսօրվա Թուրքիան: Աթաթուրքի հիմնած երկրից` այսօր Թուրքիայում գրեթե ոչինչ չի մնացել: «Ժողովրդավարության» անվան տակ Էրդողանը կառուցում է «Նոր Թուրքիա», որը սակայն, ոչ մի կապ չունի ժողովրդավարության հետ: Դա պետությունը դեպի անկում տանող, հասարակական դեգրադացիայի նպաստող Թուրքիան է, որտեղ էլ ավելի է արմատանում իսլամը: Իսկ սա ավելի անհանդուրժող ու արմատական հայացքներով Թուրքիան է` դրանից բխող բոլոր բացասական հետևանքներով: Ու ամենացցուն փաստն այն է, որ Թուրքիայի հասարակությունը հենց այսպիսի Թուրքիայում է այսօր ցանկանում ապրել: Իսկ ովքեր չեն ցանկանում, կամ հայտնվում են ճաղերի հետևում, կամ լքում են երկիրը: Թամար Բագրատունի