Ինչու է խնայում Բալասանյանը
«Սասնա ծռերի» ստեղծած իրավիճակից խառնվել է ողջ քաղաքական-հասարակական դաշտը։ Բոլորն արդարանում են իրենց խոսքի, գործի համար, առանցքային դերակատար Վիտալի Բալասանյանի խոսքին թերեւս շատերն էին սպասում։ Գարեգին Չուքասզյանի խոստացած ձայնագրության հրապարակումից հետո նրա դեմ ուղղված մեղադրանքները շեշտակիորեն մեծացել են ։ «Սասնա ծռերի» հետ Վիտալի Բալասանյանի հեռախոսազրույցում վերջինը հայտնում է, որ եթե տղաները վայր դնեն զենքերն ու խուսափեն արյունահեղությունից, Սերժ Սարգսյանը կհանդիպի Ժիրայր Սեֆիլյանի հետ։ Այդ ձայնագրության հրապարապարակումից հետո Արցախի հերոսին մեղադրեցին ստախոսության, տղաներին խաբելու մեջ։ Մի քանի օրյա լռությունից հետո Բալասանյանը պարզաբանումներ է տվել։ Նա ասել է, որ տվյալ ձայնագրությունը մոնտաժված է, մանրամասներ է ներկայացրել նաեւ բանակցություններից՝ ավելի խճճելով իրավիճակը ու առաջ բերելով նորանոր հարցականներ։ NEWS.am–ին Վիտալի Բալասանյանը պատմել է. «Երբ մենք լուրը ստացանք, Հայաստանի նախագահ Սերժ Սարգսյանը գտնվում էր Ղարաբաղում: Մենք երեկոյան հանդիպումներ ունեցանք: Առավոտյան Սերժ Սարգսյանը պետք է մեկներ։ Երբ լուրը ստացանք, ես անձամբ Բակո Սահակյանի միջոցով տեղյակ պահեցի, որ ցանկություն ունեմ ներկայանալ Երեւան եւ «Սասնա ծռերի» հետ բանակցել: Սերժ Սարգսյանը հրաժարվեց, ասաց՝ թող, մենք լուծումը կտանք: Եվս երկու օր սպասեցի, զանգեցի անձամբ Սերժ Սարգսյանին, ասացի՝ պատրաստ եմ եւ չեմ կարող ձեռնպահ մնալ, քանի որ ինչպես Լեռնային Ղարաբաղը, այնպես էլ Հայաստանի Հանրապետությունը իմ հայրենիքն է, ես էլ հայ ժողովրդի մի մասնիկն եմ, իրավունք չունեմ ընդհանրապես ձեռնպահ մնալ:Եկա, հանդիպեցի նախագահին: Ճիշտն ասած, ինձ հասած ինֆորմացիան այնքան էլ ստույգ չէր, եւ նախագահ Սարգսյանը տվեց համապատասխան ինֆորմացիան: Նախագահի հետ քննարկեցի իմ լիազորությունների շրջանակները, ճշտումներ մտցնելուց հետո հանդիպեցի Ժիրայր Սեֆիլյանի հետ, լսեցի Սեֆիլյանին, նրա առաջարկությունները: Կետ առ կետ կա դա գրանցված, գրավոր իմ մոտ: Ինչ վերաբերում է այն լուրերին, որ Ժիրայր Սեֆիլյանը հրաժարվել է Սերժ Սարգսյանի հրաժարականից, հստակ ասեմ՝ այո: Ժիրայր Սեֆիլյանն ասել է՝ այս պահի դրությամբ ես հրաժարվում եմ եւ չեմ պահանջում Սերժ Սարգսյանի հրաժարականը, եւ կա առաջարկությունը: Առաջին կետը՝ ինձ անհապաղ ազատ արձակել եւ խափանման միջոցը փոխել: Ազատ արձակել բոլոր քաղբանտարկյալներին եւ եւս մի քանի հարց: Ես այնուհետ խոստացա Ժիրայր Սեֆիլյանին եւ ներկայացրեցի նախագահին:Հանրապետության նախագահն ընդունել է բոլոր առաջարկությունները, ուշադիր լսել է, որեւէ պատասխան չի տվել, ասել է՝ ես կքննարկեմ եւ պատասխան կտամ: Հանրապետության նախագահը նաեւ հետեւյալ առաջարկությունն է արել՝ եթե Ժիրայր Սեֆիլյանը այս պահի դրությամբ կարողանա հրահանգավորի, հորդորի կամ հրամայի, որ զինված խումբը զենքերը վայր դնի, ես պատրաստ եմ ընդունել Ժիրայր Սեֆիլյանին: Այնուհետեւ, ժիրայր Սեֆիլյանն իր խոստումները չի կատարել: Դրանից հետո այդպիսի խոսակցություն չի եղել, թե Սերժ Սարգսյանը հայտարարություն է արել՝ պատրաստ եմ հանդիպել, ու դրժել է իր խոստումը: Ի լուր աշխարհի եմ ասում, որ այդպիսի խոսակցություն ընդհանրապես չի եղել: Հանրապետության նախագահը ընդունել էր այդ կետերը եւ պատրաստ էր ցանկացած հարց քննարկել»։ Հետաքրքիր է, թե Բալասանյանը ինչի՞ վրա է հույսը դրել, երբ հայտարարում է, թե ձայնագրությունը մոնտաժված է,կամ Սեֆիլյանը չի կատարել իր խոստումը, ենթադրենք հասարակության մի որոշակի շերտ անվերապահ ընդունում է իր խոսքը, սակայն պարզ է չէ՞, որ նման պնդումը ապացուցելու համար իրեղեն փաստեր են հարկավոր։ Օրինակ,ինչու չի մանրամասնում, թե ինչ է խոստացել Սեֆիլյանը ու դրժել խոստումը, կժվար է պատկերացնել, որ նա կամ համապատասխան անձինք չունեն այսպես կոչված իրական, չմոնտաժված ձայնագրությունը, չէ՞ որ եթե «Սասնա ծռերը» կարողացել են հնարավորություն ստեղծել ու ձայնագրել զրույցը, ապա մյուս կողմի համար դա որեւէ խնդիր չպետք է ներկայացներ։ Կարելի է մտածել, որ այդ ձայնագրությունը այլ ձեռքերում են եւ Վիտալի Բալասանյանին պարզապես հնարավորություն չեն ընձեռում ըստ իր կամքի տնօրինել դա, ուրեմն հարկավոր է այդ մասին բարձրաձայնել, այլ ոչ թե հերոսներին քաղաքական խարդավանքներում մանրադրամ դարձնել, իսկ Բալասանյանին մղել իր նկատմամբ քննադատությունը մեղմելու համար պախարակել Սեֆիլյանին, առավել եւս գովերգել իրավապահ մարմիններին, որոնց գործողությունները բառի բուն իմաստով ՀՀ քաղաքացիների դեմ էր։Սա այն պարագայում, երբ պետականամետ ու երկրի ճակատագրով մտահոգ մարդը ինքնակամ լծվել է վտանգավոր իրավիճակը լիցքաթափելու գործին։ Անի Սահակյան
Հետևեք մեզ Viber-ում
