Թուրքիան ԵՄ-ից պահանջում է

18:06 - 9/օգոստոսի/2016

Թուրքիան կդադարեցնի Եվրամիության հետ միգրացիոն համաձայնության շրջանակում իր պարտականությունների կատարումը, եթե Բրյուսելը չհայտնի Թուրքիայի քաղաքացիների համար վիզային սահմանափակումների չեղարկման ամսաթիվը: Այս մասին ասել է Թուրքիայի Եվրամիության հարցերով նախարար Օմեր Չելիքը: Եվրոպական հանձնաժողովի վերջին զեկույցում, որում խոսվում է վիզային ռեժիմի չեղարկման համար Թուրքիայի կողմից պայմանների կատարման մասին, երկու կետ կա, որոնց իրականացման համար Անկարային ավելի շատ ժամանակ կպահանջվի, և հինգ կետ, որոնք անհրաժեշտ է իրականացնել մոտակա ժամանակներում: Այս պայմանների թվում է Թուրքիայում հակաահաբեկչական օրենսդրության փոփոխությունը: Ինչպես նշում է РИА Новости-ն` թուրքական իշխանությունները վիճարկում են հենց այս պահանջը: Haberturk հեռուստաալիքին տված հարցազրույցում թուրք նախարարն ասել է, որ Անկարայի կողմից հակաահաբեկչական օրենքում փոփոխություններ կատարելը, ինչը պահանջում է Բրյուսելը, սպառնալիքի տակ կդնի հենց Եվրոպայի անվտանգությունը: Հիշեցնենք, որ ԵՄ անդամ երկրների ղեկավարները մարտի կեսին Թուրքիայի հետ միգրացիոն ճգնաժամի դեմ պայքարի համատեղ նախագիծ են համաձայնեցրել: Այն, մասնավորապես, նախատեսում է թուրքական տարածքով Հունաստան հասած բոլոր ապօրինի ներգաղթյալների վերադարձը Թուրքիա և ԵՄ-ի կողմից սիրիացի ներգաղթյալների ընդունումը Թուրքիայից` «մեկը մեկի դիմաց» սկզբունքով: