Սերժ Սարգսյանը հաստատել է հայկական կողմի փոխզիջումը
Սարգսյան-Ալիև հաջորդ հանդիպումն ակնկալվում է անցկացնել օգոստոսին և այն ամենայն հավանականությամբ տեղի ունենալու Պուտինի հովանու ներքո: Իսկ օգոստոսի 8-ին Պուտինը մեկնելու է Բաքու: Ամերիկացի կոնգրեսական Ջիմ Կոստան հայկական ԶԼՄ-ներին տված հարցազրույցում օրերս էլ հայտնել էր, թե օգոստոսին ծրագրված է Հայաստանի ու Ադրբեջանի արտգործնախարարների հանդիպումը ԵԱՀԿ Մինսկի խմբում համանախագահող երկրների արտաքին քաղաքական գերատեսչությունների ղեկավարների հետ: ԵԱՀԿ Մինսկի խմբի ամերիկացի համանախագահ Ջեյմս Ուորլիը հայտարարել է, թե անհրաժեշտ է պահպանել Լեռնային Ղարաբաղի բանակցային գործընթացում դրական պահը: Նրա փոխանցմամբ՝ Մինսկի խմբի համանախագահ երկրները հակված են Ադրբեջանի և Հայաստանի նախագահների միջև երկխոսության շարունակմանը և նրանց նոր հանդիպման հնարավորությունն են ուսումնասիրում։ «Տարածաշրջան այցելելու հստակ ծրագրեր մենք տվյալ պահին չունենք, սակայն մշտական շփումների մեջ ենք կողմերի հետ՝ նախագահների հաջորդ հանդիպումը նախապատրաստելու հարցով», - ասել է ամերիկացի դիվանագետը: Ուորլիքի հավաստմամբ՝ Վիեննայի և Սանկտ Պետերբուրգի հանդիպումները շփման գծում լարվածության նվազման ուղղությամբ որոշակի արդյունքներ տվել են, բանակցային գործընթացը վերականգնվել է, ձեռք է բերվել բռնությունների ռիսկերը նվազեցնելու համաձայնություն: Օրերս Սերժ Սարգսյանը հասարակության, իշխանությունների և հոգևոր դասի ներկայացուցիչների հետ նախագահականում ունեցած հանդիպմանն իր ելույթում անդրադարձավ ղարաբաղյան հիմնախնդրին` նկատելով. «Եվս մի խնդրի անդրադառնամ, որի մասին բազմաթիվ անգամներ մենք խոսել ենք: Խոսքս Ղարաբաղի հիմնահարցի և, այսպես ասած, «հողեր հանձնելու» մասին է: Արդեն թերևս անհաշվելի են մեր հստակ դիրքորոշման հրապարակային հնչեցումներն անձամբ իմ կողմից: Կրկնում եմ՝ Լեռնային Ղարաբաղի խնդրի կարգավորման ճանապարհին միակողմանի զիջումներ չեն լինելու: Բացառվում է: Լեռնային Ղարաբաղը երբեք չի լինելու Ադրբեջանի կազմում: Բացառվում է: Մեկ անգամ ևս կրկնում եմ՝ բացառվում է: Ես իմ ողջ գիտակցական կյանքը իրականում նվիրել եմ այս խնդրին: Եվ իմ ժողովրդի համար ընդունելի տարբերակի հասնելու համար միշտ պատրաստ եմ եղել զոհաբերել ոչ միայն ցանկացած պաշտոն, այլև կյանքս: Դա այդպես է եղել երեկ, այդպես է այսօր, այդպես է լինելու վաղը»: Այսպիսով, Սերժ Սարգսյանը հստակ բացառեց «միակողմանի զիջումները», սակայն, միևնույն ժամանակ, նա տեղ թողեց փոխզիջումների համար` առանց հստակեցնելու, թե որն է այն զիջումը, որին պատրաստ է նա: Նա միայն ընդգծեց, որ Լեռնային Ղարաբաղը երբեք չի լինելու Ադրբեջանի կազմում: Սակայն, փաստացի, նա շրջանցեց տարածքների հանձնման թեման, որի մասին արդեն տևական ժամանակ խոսակցություններ են շրջանառվում: Արդյո՞ք Սերժ Սարգսյանի նշած «փոխզիջումները» հենց տարածքային զիջումներ են ակնկալվում: Եթե այո, ապա, ավելի լավ կլիներ Սերժ Սարգսյանն այդ մասին հրապարակային խոսեր, քան այդ մասին հայ հասարակությունն իմանար այլ աղբյուրներից, օրինակ, ռուսական աղբյուրներից, Պուտինի` Բաքու կատարած այցից հետո: Մետաքսյա Շալունց
Հետևեք մեզ Viber-ում
