Արմեն Լամբարյանին շտապօգնության մեքենայով տեղափոխեցին դատարան. նրան կալանավորեցին

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը բավարարել է «Սասնա ծռեր» խմբավորման անդամ Արմեն Լամբարյանին կալանավորելու միջնորդությունը։ Այս մասին 168.am-ին հայտնեց նրա պաշտպան Ինեսսա Պետրոսյանը։ «Վիճակը ծանր է՝ երկու ոտքից հրազենային, գնդացրային վնասվածքներով։ Հուլիսի 29-ից գտնվել է «Էրեբունի» բժշկական կենտրոնում։ Այդ ընթացքում զրկված է եղել իրավաբանական օգնություն ստանալու հնարավորությունից, արգելված է եղել պաշտպանի, հարազատների մուտքը, և փաստորեն այսօր միայն հաջողվեց ներգրավվել գործով, անմիջապես էլ մեղադրանք են առաջադրել ու անմիջապես շտապօգնության մեքենայով տեղափոխեցին Արաբկիր և Քանաքեռ- Զեյթուն վարչական շրջանների ընդհանուր իրավասության դատարան, որտեղ դատավոր Բունիաթյանի նախագահությամբ քննության առնվեց վարույթ իրականացնող մարմնի միջնորդությունը։ Մեր կողմից ներկայացվեցին առարկություններ, դատարանը հեռացել է խորհրդակցական սենյակ։ Բնականաբար, որևէ կասկած չունենք, որ այս հերթական անօրինական միջնորդությունը կբավարարվի, ինչպես և մյուսները»,- մինչև դատարանի կողմից որոշման հրապարակումն ասել էր Ինեսսա Պետրոսյանը՝ նշելով, որ Արմեն Լամբարյանին մեղադրանք է առաջադրվել ՀՀ Քրեական օրենսգրքի երեք հոդվածներով՝ 218-րդ հոդված՝ պատանդ վերցնելը, 219-րդ հոդված՝ շենքեր, շինություններ, տրանսպորտի, հաղորդակցության կամ կապի միջոցներ զավթելը, 235-րդ հոդված՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը։ Ինեսսա Պետրոսյանի խոսքով՝ Արմեն Լամբարյանն իրեն մեղավոր չի ճանաչել, հրաժարվել է ցուցմունք տալ. «Ասել է, որ պահանջում է պատասխանատվության ենթարկել իրեն մահափորձի ենթարկած անձին»։