Րաֆֆին անդրդվելի է
«Ժառանգության» կորուսյալ ղեկավար Րաֆֆի Հովհաննսիայնը կրկին հայտնվել է, քանզի քաղաքական ասպարեզում մնալու նոր հորիզոններ են բացվել,ինչպես եւ գլխատված շարժմանը տեր կանգնելու մեծ, նոր աղոթքի հնարավորություն, որը դարձել է նախորդի ուրացման պատճառ՝ Ոստիկանապետ Վովա Գասպարյանի հրաժարականի պահանջի բարձրաձայնում։ Րաֆֆին զորավարի հրաժարականն է պահանջում ու էլի շատ հրաժարականներ։ Հուլիսի 17-ից, «Սասնա ծռերը» գրավեցին ՊՊԾ շենքը ու համաժողովրդական ալիք բարձրացավ, շատ քաղաքական գործիչների հետ հանրության փնտրտուքների կիզակետում էր նաեւ Րաֆֆի Հովհաննիսյանի անունը։ Սակայն նա հայտնվել է հիմա՝ հույս ունենալով, որ կպահի ընդվզման այն ալիքը, որը բարձրացրել էին «Սասնա ծռերը»։ Րաֆֆին Րաֆֆի չէր լինի, որ տեր չկանգներ բողոքավոր ժողովրդին ու «բադասխան» չպահանջեր իշխանություններից:Ու սուրբ գործն իրագործելու մողումով նա իր թիմով ասուլիս է հրավիրել ու կոչ է անում ժողովրդին կանգնել հրապարակներում, փողոցներում, բանտերի դիմաց՝ առաջարկելով իրենց լուծումները: Րաֆֆի Հովհաննիսյանը խոստացավ, որ բոլոր ճակատներով են պայքարելու՝ ներսում ու դրսում պիտի այնպես անեն, որ հայ մարդը սեփական երկրում պաշտպանված լինի, որ ոստիկանը, առանց որեւէ պատճառի իր ծունկերը չջարդի, աչքը չհանի, հետո իրեն ահաբեկիչ կոչի: Նա ասաց, որ եթե սփյուռքը շարունակի «տիտիկ անել» իր կուսակցական կեղծ բաժանումների վրա եւ մաս չկազմի քննադատական հայրենասիրության վրա, ոչ մի բան չի փոխի։ Նա ասաց, որ Սասնա ծռերի ոգին պետք է ունենա իր շարունակությունը բոլոր քաղաքներում. «Եթե նորմալ քաղաքական գործընթացներում չի կարելի հարց լուծել, նոր Սասնա ծռեր կծնվեն: Թող ծաղրեն, բայց իրենք իսկապես հակաահաբեկչական զինվորներ են: Սարի թաղի նկարները ցույց են տալիս, թե ով էր այնտեղ ահաբեկիչը ու ով էր հակաահաբեկիչը՝ անտիտեռորիստը: Ով էր այդ ոստիկաններին ուղարկել այնտեղ: Սա արդեն իմ պահանջը չէ միայն: Եթե ընտրություններով, նորմալ քաղաքական գործընթացներով չկարողանանք հասնել արտահերթ լուծումների, ՀՀ-ում կլինեն նոր Սասնա ծռեր, եւ կլինի յուրաքանչյուրս»: Ամնեզիայով տառապող կամ քաղաքական անմեղսունակության մարմնացում այս գործիչը թվում էր, թե երբեք ջրի երես դուրս չի գա անհաջող պայքարներից ու անփառունակ վախճաններից հետո, բայց Րաֆֆին անդրդվելի է։ Նախագահական ընտրություններից հետո նրա պահանջատիրություն ավարտվեց զորավարի հետ զորեղ աղոթքով ու թվում էր՝ այդ աղոթքի զորեղ ազդեցությունը երբեւէ ջրի երես չէր հանի Րաֆֆի Հովհաննիսյանին, բայց իրականությունն այն է, որ մեր քրիստոնեա հայրենակցի սիրտը բոլոր ժամանակներում աղոթք է ուզում: Վովա Գասպարյանի հետ աղոթքի զորությունը «Ժառանգության» առաջնորդն այդպես էլ չզգաց, նրա քաղաքական կշիռն օրեցօր փշրանքների է վերածվում ։ Նա իր անհեթեթ քայլերով ֆանտաստիկ արագությամբ մսխեց քաղաքական այն կապիտալը, որը ժողովրդի կողմից ստացել էր նախագահական ընտրություններից հետո։ 540 հազար քվե ստացած նախագահի թեկնածուի հանրահավաքներին մեկ ամիս հետո ամենաշատը մի քանի տասնյակ մարդ էր մասնակցում։ Հիմա ընտրությունների նախաշեմին Րաֆֆի Հովհաննիսյանը որոշել է սրբագրել սխալները ու ուրանալ զորավարի հետ աղոթքը, պահանջել նրա հրաժարականը, գուցե այս փորձը հաջողի։ Անի Սահակյան
Հետևեք մեզ Viber-ում
