Չզայրացնել Պուտինին` հայերի հարցով

Ռուսաստանյան Life հեռուստաալիքի եթերում, պատասխանելով լրագրողի հարցերից մեկին, որը վերաբերել է Հայաստանին, Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկին հայտարարել է, թե «թքած Հայաստանի վրա ևս ….»: Լրագրողը ցանկացել է պարզել, թե ինչ դիրքորոշում ունի քաղաքական գործիչը Հայաստանում կատարվող իրադարձությունների վերաբերյալ: «Այնտեղ պարբերաբար կլինեն ելույթներ: Փոքր երկիր է, լեռնային, սեղմված լեռների միջև, Ադրբեջանի և Թուրքիայի միջև, ո´չ մի հեռանկար, ո՛չ մի տնտեսություն: Այնտեղ արդեն 1 միլիոն հայ է մնացել, իսկ աշխարհում կա 6 միլիոն հայ: Նրանք բոլորն էլ հեռացել են: Լիբանան, Իրան, Ռուսաստան, Ֆրանսիա, Նահանգներ, ողջ աշխարհում ման են գալիս: Այնտեղ ապրելու տեղ չկա` լեռներ են: Բնականաբար, այնտեղ տարբեր խմբավորումներ միմյանց նկատմամբ ստորություններ են անելու»,- հայտարարել է Ժիրինովսկին: Լրագրողի դիտարկմանը, թե Հայաստանում Ռուսաստանն ունի ռազմաբազա, Ժիրինովսկին հետևյալ կերպ է արձագանքել. «Աստծու սիրուն, կթքեն մեր վրա, դուրս կբերենք բազան… Մեր ոտքերի տակ կընկնեն բազան վերադարձնելու համար: Այդ բազան նրանց փրկությունն է, հակառակ դեպքում նրանց երկու կողմից կջնջեն թուրքերն ու ադրբեջանցիները: Դրա համար էլ Հայաստանի մասին պետք չէ անհանգստանալ: Նրանք երբեք մեզանից չեն հրաժարվի, քանի որ դա կլինի նրանց վերջը: Ադրբեջանն անմիջապես կգրավի Լեռնային Ղարաբաղը, նրանց թուրքերը կօգնեն: Հայաստանին 300 տարի առաջ Եկատերինա Երկրորդ թագուհին է փրկել: Թուրքերը դուրս էին հանում բոլորին: Նրանք արդեն այդ ժամանակ էին վարում բոլորից ազատվելու քաղաքականություն: Լրագրողի դիտարկմանը, թե հայերը բազմաթիվ զորավարներ են ունեցել, որոնք կռվել են, Ժիրինովսկին հակադարձել է` ասելով, թե ինքը չի ասում, թե հայերն անտաղանդ ժողովուրդ են: «Յուրաքանչյուր ժողովուրդ ունի ինչ-որ ձեռքբերումներ: Ես խոսում եմ ճակատագրի մասին … Հայաստանն ազատ է, սակայն դա այն մեծ Հայաստանի մի փոքր մասն է»,- ասել է նա: Ժիրինովսկին պարբերաբար խոսում է, ընդ որում ասում է այն, ինչ այդ պահին Կրեմլը ցանկանում է «հասցնել» ում պետք է: Կարելի է նրան ծաղրածու համարել, խեղկատակ, անլուրջ կամ ցինիկ, բայց Ժիրինովսկին ռուսական քաղաքական էլիտա է: Հետևաբար, գոնե մեկ անգամ պաշտոնական Երևանից որևէ մակարդակով պարտավոր է պատասխանել: Բայց... Պարզվում է, ՀՀ ԱԳՆ-ն ՌԴ Պետդումայի պատգամավոր Վլադիմիր Ժիրինովսկիի հայտարարություններին լրջորեն արձագանքելն անիմաստ է համարում: Այս մասին 168.am-ի հետ զրույցում ասել է ՀՀ ԱԳՆ խոսնակ Տիգրան Բալայանը: Ախր, հարգելիներ, Ժիրինովսկին, վերջիվերջո Ռուսաստանի դաշնության պետական խորհրդի անդամ է, ռուսական պետական հեռուստաընկերությունների թոք-շոուների աստղը, այսինքն` Կրեմլի քաղաքական գծի կոնկրետ արտահայտողն է ու Պուտինի պաշտպանը։ Էլ ո՞վ պետք է լինի, որ ՀՀ ԱԳՆ-ի խոսնակը հարկ համարի մեկնաբանել: Նա ռուս քաղաքական գործիչ է, եթե ՀՀ ԱԳՆ Ռուսաստանի քաղաքական գործիչների չի մեկնաբանում, էլ ո՞ւմ պետք է մեկնաբանի: Ավելին, այդ մարդը որերորդ անգամ վիրավորում է Հայաստանի հանրապետությունն ու նրա քաղաքացիներին: Շատերը կասեն, որ նա դա անում է, քանի որ Ալիևից նավթադոլարներ է ստանում: Բայց ներեցեք, իսկ ի՞նչն է խանգարում ձեզ այդ մասին պաշտոնապես հայտարարել ու գրողի ծոցն ուղարկել Ժիրինովսկուն: Թե՞ պաշտոնական Երևանը չի մեկնաբանում, որովհետև գիտի, որ Ժիրինովսկին Պուտինի կարծիքն է արտահայտում, իսկ այս դեպքում, իհարկե, պաշտոնական Երևանը չի կարող համարձակվել զայրացնել Պուտինին: Մետաքսյա Շալունց