Քայքայիչ «հրեշի» վերջը
Դեռ երկար է քննարկվելու «Սասնա ծռերի» կողմից ՊՊԾ-ն գրավելու և դրանից հետո ի ցույց դրված մեր քաղաքական դաշտի ամլությունը: Մի բան, որի մասին վաղուց էր խոսվում, սակայն հուլիսի 17-ից հետո, կարծես, ավելի ցայտուն դարձավ այդ անհերքելի փաստը: Սերժ Սարգսյանը նախօրեին նախագահականում ելույթ ունենալով պաշտոնյաների, քաղաքական ու հասարակական գործիչների, լրագրողների առջև` չխոսեց հնարավոր պաշտոնանկությունների կամ արտահերթ քայլերի մասին, բայց շեշտեց, որ իշխանություններ այսօր ավելի նպատակադրված են առաջ տանելու դրական փոփոխությունները: «Այս փուլում մեր նպատակը նաև ազգային համաձայնության իշխանություն ձևավորելն է», -ասաց նա` ըստ ամենայնի ակնարկելով գարնանը կայանալիք խորհրդարանական ընտրություններից հետո ձևավորվելիք իշխանությունը: «Սահմանադրական բարեփոխումները հենց դրա մասին էին, Ազգային համաձայնության կառավարությունն իրեն չգտած ինչ-որ մեկի՝ դեպի աթոռ սողոսկելու մասին չէ, այն քաղաքական պատասխանատվության հնարավորինս լայն տեղաբաշխման և կիսելու մասին է, ինչի ինստիտուցիոնալ ողջ հենքը մենք արդեն ապահովել ենք: Վստահաբար պնդում եմ, որ ընդամենը ամիսներ անց մենք ունենալու ենք հենց այդպիսի կառավարություն, հենց այդպիսի իշխանություն», - հայտարարել է Սերժ Սարգսյանը՝ չհստակեցնելով արտահե՞րթ, թե՞ հերթական ընտրությունների արդյունքում: Հայաստանի քաղաքական ողջ դաշտի ճահճային բնույթը` վերից վար, ի վերջո չարիք էր դառնալու: Հասարակական ընդվզման առկայության պայմաններում մենք իրականում տեսանք, որ ժողովուրդը մերժում է ոչ միայն իշխանությանը: Գալու է մի պահ, մերժվելու են բոլորը, ինչպես ասում են, հայտնվելու են «կոտրած տաշտակի առջև»: Սրա պատճառները խորքային են և մեկ օրվա, մի քանի ամսվա, կամ մի քանի տարվա խորության չեն: Դրանց հիմքերը դրվել են օրի-օրի` հետևողական քայլերով 20 տարիների ընթացքում: Պարզապես այսօրվա իշխանություններն, ի պաշտոն, պարտավոր են դա արձանագրել ու իրապես հետևություններ անել: Իշխանությունները ամեն ինչից բացի, երբ խոսում են պատասխանատվության մասին, իշխանական համակարգում բարեփոխումների, կամ և այլնի մասին, պետք է խոստովանեն նաև մի շատ կարևոր հարցում` ինչո՞ւ այսչափ ապականվեց քաղաքական դաշտը: Իշխանությունը, գուցե, չի ընկալում, թե ինչ մարտահրավերի առջև է կանգնած այսօր: Բայց իսկապես, եթե կա գիտակցում, որ պետք է «դասեր քաղել», ուրեմն, այդ ժամանակը եկել էր վաղուց, այսօր պարզապես հասարակությունն արձանագրվեց, որ անցել է այդ ժամանակը: Սրանից հետո կամ` ինչ-որ բան պետք է իրապես փոխվել, կամ` մեր երկրի զարգացումը ուղղակի անհնար է այս համակարգի գոյության պայմաններում: Սա քայքայիչ համակարգ է բոլոր առումներով` քաղաքականությունից, տնտեսությունից սկսած`մնացյալով ավարտված: Թամար Բագրատունի
Հետևեք մեզ Viber-ում
