Ո՞վ կփոխարինի Գեւորգ Կոստանյանին

«Հրապարակը» քիչ առաջ հայտնել էր, որ Գեւորգ Կոստանյանը հրաժարական է ներկայացրել: Գլխավոր դատախազի խորհրդական Քրիստինե Մելքոնյանը ArmLur.am-ին հաստատեց մեր լուրը: Հարցին, թե որն է պատճառը, Մելքոնյանը պատասխանել է, որ Գևորգ Կոստանյանը առողջական խնդիրների պատճառով այլևս չի կարողանալու շարունակել աշխատանքը:  Իշխանական վերնախավում արդեն իսկ քննարկվում են հավանական փոխարինողների անունները: Այսպես, շրջանառվում են մի քանի անուններ: Հավանական թեկնածու է դիտարկվում նախագահի օգնական Հրայր Ղուկասյանը: Հրայր Ղուկասյանը Վճռաբեկ դատարանի նախկին դատավոր Հովհաննես Ղուկասյանի որդին է, թոշակի գնալուց հետո հայրը աշխատել է Վճռաբեկ դատարանի նախագահի խորհրդական: Ինքը՝ Հրայր Ղուկասյանը, քրեական իրավունքի մասնագետ է, դոցենտ, մասնակցել է օրենսգրքերի մշակմանը: Աշխատել է որպես փաստաբան, նաեւ դասավանդել է ԵՊՀ-ում, նախագահի ռեֆերենտ է նշանակվել 2014թ փետրվարից: Նա նախագահի օգնական է նշանակվել Գեորգի Կուտոյանի ԱԱԾ պետ նշանակվելուց հետո: Այժմ փաստորեն հավակնում է գլխավոր դատախազի պաշտոնին: Մյուս հավանական թեկնածուն վերջերս Հրաչ Բադալյանի փոխարեն Կոստանյանի տեղակալ նշանակված Արթուր Դավթյանն է: Վերջինս Կոստանյանի մտերիմներից է, այդ է պատճառը, որ գլխավոր դատախազ դառնալուց հետո նրա առաջին հրամաններից մեկն Արթուր Դավթյանին Շենգավիթի դատախազի պաշտոնից հանելն ու քաղաքի դատախազ նշանակելն էր։ Նշենք, որ Գեւորգ Կոստանյանը գլխավոր դատախազ է նշանակվել 2013թ 6 տարի ժամկետով: Նա 2004թ.-ից մինչ այժմ ՀՀ կառավարության լիազոր-ներկայացուցիչն է Մարդու իրավունքների եվրոպական դատարանում: Կոստանյանը նախկինում աշխատել է զինդատախազ, դատախազի տեղակալ, նախագահի օգնական: Աշխատել է նաեւ արդարադատության նախարարությունում` որպես նախարարի տեղակալ, խորհրդական: