«Հաղթանակ»` քողարկված պարտության մեջ
«Անընդունելի իրավիճակն ավարտվել է, սակայն ամբողջական հանգուցալուծումը դեռևս առջևում է», երեկ նախագահականում հասարակության տարբեր շերտերի ներկայացուցիչների հետ հանդիպմանն է ՀՀ նախագահ Սերժ Սարգսյանը՝ մեկնաբանելով ոստիկանության պարեկապահակային ծառայության գնդի վրա զինյալների խմբի կատարած հարձակման հետևանքով ստեղծված իրավիճակը: «Առաջին հերթին պետք է իրականացվի մանրազնին հետաքննություն, համակողմանի և անաչառ քննություն, բաց դատավարություն: Յուրաքանչյուր ոք պետք է պատասխան տա իր արարքների համար միայն ու միայն օրենքի առաջ: Որևէ այլ դրսևորում չի լինելու, անձնական վրեժխնդրության բոլոր փորձերը կասեցվելու են օրենքի ուժով», - հավաստիացրել է Սերժ Սարգսյանը: «Եկել է եզրակացություններ կատարելու ժամանակը։ Այս իրադարձությունների ամբողջական վերլուծությունը դեռ երկար ժամանակ կպահանջի։ Սակայն մի բան ակնհայտ է. ներհայաստանյան հասարակական և քաղաքական կյանքում անհրաժեշտ է արագացնել արմատական փոփոխությունների գործընթացը», - նշել է նա: Ս.Սարգսյանն իր ելույթի զգալի մասը նվիրել է «զենքով և բռնությամբ հարցեր լուծելու աղետալի մտայնությանը» և անթույլատրելի համարել անցած երկու շաբաթվա ընթացքում երկրի կրած կորուստները՝ «մարդկային, հասարակական, արժեքային կորուստներից սկսած մինչև այն հսկայական հարվածը, որ հասցվեց մեր տնտեսությանը»: «Զենքով և բռնությամբ Հայաստանում հարցեր չեն լուծվելու», - ասել է Սերժ Սարգսյանը, - «Ցանկացած ոք կարող է չսիրել իշխանություններին, կարող է չսիրել կառավարությանը, չսիրել նախագահին և կտրուկ դեմ լինել այն քաղաքականությանը, որն իրականացվում է, բայց չսիրելն ամենևին հիմք չէ հերոսացնելու համար զենքով հարցեր լուծողին: Իշխանությունները կգան ու կգնան, ահաբեկչության խրախուսումը քաղցկեղի պես կմնա ու կտարածվի, կոչնչացնի մեր ժողովրդի կողմից ստեղծած ամեն ինչ: Սրանից սարսափել է պետք, սա հիմնովին արմատախիլ անել է պետք»: Նա խոսել է նաև երկրում առկա խնդիրների «լուծումներն արագացնելու» անհրաժեշտության մասին՝ նշելով․ «Այս փուլում մեր նպատակը նաև ազգային համաձայնության իշխանություն ձևավորելն է, որտեղ լուծումների իրականացումը կլինի լայն համաձայնության դաշտի պատասխանատվության ներքո: Սահմանադրական բարեփոխումները հենց դրա մասին էին, հենց այդպիսի իշխանություն ձևավորելու հիմքն է դրվել այդ բարեփոխումներով»: Պնդելով, որ նման «Ազգային համաձայնության կառավարության» ձևավորման ինստիտուցիոնալ ողջ հենքը արդեն ապահովված է, նա ասել է․«Վստահաբար պնդում եմ, որ ընդամենը ամիսներ անց մենք ունենալու ենք հենց այդպիսի կառավարություն, հենց այդպիսի իշխանություն»: Բնականաբար, Ս.Սարգսյանն անդրադարձել է նաև ԼՂ խնդրով բանակցություններին՝ հավաստիացնելով, որ` «միակողմանի զիջումներ չեն լինելու». «Լեռնային Ղարաբաղը երբեք չի լինելու Ադրբեջանի կազմում: Բացառվում է: Մեկ անգամ ևս կրկնում եմ՝ բացառվում է: Ես իմ ողջ գիտակցական կյանքը իրականում նվիրել եմ այս խնդրին: Եվ իմ ժողովրդի համար ընդունելի տարբերակի հասնելու համար միշտ պատրաստ եմ եղել զոհաբերել ոչ միայն ցանկացած պաշտոն, այլև կյանքս»: Այսպես, սկսենք ԼՂ խնդրից: «Սասնա ծռեր» խմբի անդամների հանձնվելուց հետո, ստեղծվել է մի մթնոլորտ, երբ հենց Սերժ Սարգսյանն է դառնալու` «ոչ մի թիզ հող չենք զիջելու» կարգախոսի ջատագովը` առաջիկա բանակցություններում: Ս.Սարգսյանը վարպետորեն մատնացույց է անելու հուլիսի 17-ից հետո Հայաստանում արթնացած արմատական դիրքորոշումները` դրանք նաև ներկայացնելով որպես Ղարաբաղի խնդրի շուրջ հիմնավոր և փաստական դժգոհության առիթ: Հաջորդը: «Սասնա ծռերի» կողմից ՊՊԾ-ի գրավման առաջին իսկ ժամերից սկսեց ամրանալ այն համոզմունքը, որ իշխանություն գոյություն չունի: Նախ` դրա համար հիմք էր ծառայում այն հարցը, թե ինչպե՞ս էր հաջողվել «Սասնա ծռերին» հարձակում գործել ՊՊԾ գնդի վրա, որտե՞ղ էին մեր իրավապահները: Իշխանության չգոյության մյուս հիմնավորումն էր` իշխող էլիտայի քար լռությունը երկու շաբաթների ընթացքում, հասարակության հետ անհաղորդ լինելը: Իշխանություն-ժողովուրդ անդունդն այս երկու շաբաթներին առավել քան երբևէ ցայտուն էր: Մինչդեռ այսօր, «Սասնա ծռերի» հանձնվելուց հետո, եթե ոմանց համար ավարտ էր` ինչ-որ փուլի համար, ապա Սերժ Սարգսյանի համար մեկնարկ է: Իրականում, ստեղծված վիճակը, որքան էլ բարդագույն էր իշխանության համար ու ծառայեց իշխանությանը թուլացմանը, միևնույն ժամանակ, Սերժ Սարգսյանը նախագահականում ունեցած իր ելույթում ցույց է տալիս, որ իշխանությունը հաղթական դիրքերից է հանդես գալիս. «Սասնա ծռերը», այնուամենայնիվ, հանձնվեցին, իրավապահները նրանց արյունը չթափեցին, ավելին` իրավապահներից զոհեր եղան, սակայն, «Սասնա ծռերը» իրենց առջև դրած վերջնական նպատակին չհասան, թեև հասարակական ընդվզում ծնվեց: Սա նոր խաղ է Սերժ Սարգսյանի համար: Իշխանությունն իրականում, էականորեն թույլ էր, կտրված հասարակությունից, այսօր էլ, երբ ընդվզում կա, իշխանությունը կարծես դա չի տեսնում, չի խոստովանում դրա պատճառները, թույլ տված սխալները: Նույնը ընդդիմությունը: Դարձել է վարչախմբի մաս` մեկ պաշտոններում, մեկ առանց պաշտոնների, բայց մշտապես իշխանական կերակրատաշտին մոտ: Ու ամենակարևորը` այստեղ էլ, հասարակական վստահության մեծ պակաս կա: Ավելին, պարզվեց, Հայաստանում գոնե մեկ հեղինակություն չկա, որը կարող էր բանակցել Սեֆիլյանի ու «Սասնա ծռերի» հետ: Որտե՞ղ էր Վլադիմիր Գասպարյանն այս երկու շաբաթների ընթացքում, ինչու՞ չեկավ աղոթելու Խորենացի փողոցում: Թող գար, ստանձներ այն դերակատարումը, որն ունեցավ Վիտալի Բալասանյանը: Բայց, իհարկե, պարզ է բոլորին, որ դա չէր կարող տեղի ունենալ, որովհետև նույնիսկ Սերժ Սարգսյանը գիտի, որ այդ դերակատարության համար ոստիկանապետը անհրաժեշտ որակներ չունի, նրա դերը միայն պատեհ անպատեհ բարեփոխվող ոստիկանության մասին խոսելն է: Սակայն այդ մի առասպելն էլ ջարդվեց: Վերջին օրերի բռնությունները նաև փլուզեցին Վլադիմիր Գասպարյանի ստեղծած առասպելը: Ու այստեղ հետաքրքրական է, որ հենց Սերժ Սարգսյանը ներողություն խնդրեց լրագրողներից` Վլադիմիր Գասպարյանի փոխարեն, կարծես վերջնականապես ցույց տալով նրա` ավարտված լինելը: Անընդունելի իրավիճակն ավարտվել է, սակայն ամբողջական հանգուցալուծումը դեռևս առջևում է, ասում է Սերժ Սարգսյանը: Քիչ անց կպարզվի` սա ընդամենը պարտությունը քողարկելու ելո՞ւյթ էր, թե՞ իրապես ինչ-որ բան այս երկրում փոխելու ցանկությամբ մեկնարկ: Թամար Բագրատունի