Հայրենիքի հետ կապը գնալով նվազում է. Ռուսաստանի հայերի միության փոխնախագահ

«Արմենիա» հայկական ավիափոխադրողը կատարեց իր առաջին կանոնավոր թռիչքը դեպի Մոսկվա՝ «Վնուկովո» օդանավակայան: «Արմենիա» ավիաընկերության գլխավոր տնօրեն Ռոբերտ Օգանեսյանի խոսքերով՝ իրենց ավիաընկերության տոմսերը հնարավոր է գնել 49 եվրոյից սկսած մինչեւ 500-600 եվրո. «49 եվրոյով տոմս գնելու համար ուղեւորը պետք է 16 օր շուտ գնի այն»: Ի դեպ, նշված գնի մեջ ներառված չեն հարկերը։ Պարոն Օգանեսյանը վստահ է՝ իրենք կդիմանան մրցակցությանը եւ կընդլայնեն իրենց թռիչքների աշխարհագրությունը. «Մենք այստեղ եկել ենք եկարաժամկետ ծրագրերով եւ վճռական»: ՌԴ-ում ՀՀ դեսպանության դեսպանորդ Վարդան Հակոբյանը հույս ունի, որ հայկական ավիափոխադրողի մուտքը էականորեն կազդի գների վրա, հատկապես երբ հոսքը դեպի Ռուսաստան մեծ է։ Ռուսաստանի hայերի միությունն անհանգստացած է՝ հայրենիքի հետ կապը գնալով նվազում է:             «Եթե առաջ ՌԴ-ում շատ մարդիկ էին աշխատում ու ընտանիքները ՀՀ-ում էին եւ նորից հետ էին վերադառնում, հիմա, ցավոք, մարդիկ ՀՀ-ից իրենց ընտանիքներին ընդմիշտ՝ մշտական բնակության են բերում Մոսկվա»,- ասում է Ռուսաստանի հայերի միության փոխնախագահ Լեւոն Մուկանյանը: Անկում է ապրում նաեւ  գործարար համագործակցությունը: «Համակարգային խնդիր է, որ պետք է լուծել: Դա կապված է նաեւ ՀՀ-ում եղած բիզնես մթնոլորտի հետ եւ պատահական չէ, որ այն իրադարձությունները, որ հիմա կատարվում են Երեւանում, շոշափում են նաեւ այս հարցը: Արդյունքում մարդիկ խաղաղ պայմաններում, այլ ոչ պատերազմական շրջանում, ՀՀ-ից հեռանում են»,- ընդգծեց նա: 2016-ի ապրիլի տվյալներով` Ռուսաստանում է գտնվում ՀՀ մոտ 472 հազար քաղաքացի: Նյութի աղբյուրն՝ Ա 1+