Անհասկանալի հարցեր, որոնք պատասխան են պահանջում
Սասնա ծռերը կրկին ոտքի են հանել իշխանություններից դժգոհ զանգվածներին ու չնայած մի քանի օր է Երեւանում կրկին համաժողովրդական պայքարի ոգին է թեւածում ու բազմահազարանոց հանրահավաքների ականատեսն ենք լինում, այդուհանդերձ հանրության մեջ դեռ չի գտնվել մի քանի հարցի պատասխան՝ խմբի ու իշխանության գործողությունների վերաբերյալ, որոնք որոշակիորեն անվստահության պատ են առաջացրել նաեւ այս շարժման առաջ: Այսպիսով՝ առաջին հարցը հետեւյան է՝ ինչպես կամ ինչու էր Սեֆիլյանի թիմը վրիպել համապատասխան կառույցների ուշադրությունից, որի արդյունքում հնարավոր եղավ հասնել նման իրավիճակի: Ըստ ՀՀ քննչական կոմիտեի պաշտոնական հաղորդագրության՝ հիշեցնենք, որ Ժիրայր Սեֆիլյանի կալանավորումը պայմանավորված էր մայիսի 20-ին տեղի ունեցած մի ավտովթարով, ինչի հետեւանքով իրավապահները զենք-զինամթերք էին հայտնաբերել: Այս գործով կալանավորվել է 9 անձ, եւ ըստ պաշտոնական վարկածի՝ Ժիրայր Սէֆիլյանն անմիջական շփումներ է ունեցել քրեական գործով որպես մեղադրյալ ներգրավված տարբեր անձանց հետ, որոնց ուղղակիորեն հանձնարարել է ապօրինի կերպով պահվող զենք եւ ռազմամթերք փոխադրել, ինչպես նաեւ պատրաստ լինել համապատասխան հրամանի դեպքում օգտագործել դրանք: Ըստ պաշտոնական վարկածի՝ վերջիններս պետք է գրավեին հեռուստաաշտարակը, Նուբարաշենի զորամասը, սակայն այս գործողությունները տապալվեցին: Ասել է թե Ժիրայր Սեֆիլյանը, հետեւաբար նրա թիմը պատրաստվում էր զինված հեղափոխության: Այս պարագայում դժվար է հավատալ, որ իրավապահ մարմինները չեն զբաղվել Սեֆիլյանի թիմով, նրանց չեն պահել ուշադրության կենտրոնում: Որովհետեւ այսօր անգամ շարքայինների հեռախոազրույցների գաղտնիությունն ապահովված չէ, հապա ինչով է բացատրվում Սասնա ծռերի հանդեպ այս առատաձեռնությունը: Երկրորդ նյուանսն էլ կապված է այսօրվա դեպքի հետ՝ ինչպե՞ս է հնարավոր ճեղքել ոստիկանական արգելապատնեշը ու սնունդ հասցնել ՊՊԾ գնդում գտնվողներին, ողջ եւ առողջ, մինչեւ անգամ առանց վնասվածքների դուրս գալ ոստիկանական կրակահերթի տակից՝ հերոսաբար կատարել առաքելոթյունը, նույնքան հերոսաբար էլ հեռանալ ՊՊԾ գնդից՝ առանց որեւէ պատասխանատվության: Սա կնշանակի, որ կամ գործ ունենք ոստիկանության բեմադրած սադրանքի հետ, երբ յուրայինի միջոցով սնունդ հասցնելով նպատակ է հետապնդվում այլ խնդիր լուծել, օրինակ հնարավոր է, որ տղաներին հասցված սնունդը հագեցած լիներ քնաբերով, որից հետո ոստիկանությունը հանգիստ գործի կանցնեի, կամ էլ , եթե այդ ամենը ճիշտ է,կնշանակի, որ մենք ոստիկանության համակարգ չունենք եւ մի հոգին կարող է ոստիկանության մի ողջ բանակ շրջանցել: Ի դեպ, առաջին իսկ օրվանից, երբ ոստիկաններ էին <պատանդի> կարգավիճակում գտնվում, շատերն էին տարակուսանք հայտնում՝ փաստարկելով, որ հնարավոր էր օպերացիա մշակել ու ներսում վնասազեևծել խմբին, քանի որ խոսքը պատրաստված ու ոստիկանի կարգավիճակ ունեցող մարդկանց մասին է: Ինչեւէ, անհասկանալի հարցերն այսքանով սպառված չեն, որոնք խորացնում են կասկածները կատարվածի վերաբերյալ: Անի Սահակյան