Ալեք Ենիգոմշյանի համար մեկուսարանում չկան ապրելու պայմաններ
19:15 ԱԱԾ ժամանակավոր պահման մեկուսարանում գտնվող Հիմնադիր խորհրդարանի անդամ Ալեք Ենիգոմշյանի մոտ խնդիրներ են ծագել՝ տարրական պայմանների հետ կապված: «Սնվելու, ջրի, գիրք կարդալու: Նա այնտեղ մենակ է մնում եւ շատ դժվար է»,- «Ա1+»-ին ասաց նրա պաշտպան Նիկոլայ Բաղդասարյանը: Այսօր փաստաբանը Մարդու իրավունքների պաշտպանի գրասենյակի ներկայացուցչի հետ այցելել է հաշմանդամություն ունեցող Ալեք Ենիգոմշյանին: Նիկոլայ Բաղդասարյանի խոսքերով՝ պաշտպանի գրասենյակն այժմ զբաղվում է այդ խնդիրներով, սակայն վարչակազմը տեխնիկապես չի կարող այդ խնդիրները լուծել: ԱԱԾ ժամանակավոր պահման մեկուսարանում, ըստ պաշտպանի, չկան Ենիգոմշյանի ապրելու համար համապատասխան պայմաններ, նրա նորմալ կենսամակարդակն ապահովելու պայմաններ: Բացի այդ, Ալեք Ենիգոմշյանին փաստաթղթերը պետք է տրամադրվեն բրայլյան այբուբենով, որպեսզի կարողանա կարդալ եւ պաշտպանել իր իրավունքները: Ալեք Ենիգոմշյանը կասկածվում է հուլիսի 17-ին ոստիկանության պարեկապահակային ծառայության՝ ՊՊԾ գնդի տարածքը գրաված զինված խմբին օժանդակելու մեջ:
Հետևեք մեզ Viber-ում
